Sunburn Festival : पणजी, जगभरातील संगीत महोत्सवांच्या पहिल्या तीन क्रमांकांच्या यादीत स्थान असलेला 'सनबर्न' यंदा अधिकच वादाच्या भोवऱ्यात सापडला.

त्यातच सनबर्नचे आयोजक हरिंद्र सिंग यांनी २०२३ सालचा महोत्सव त्यांचा गोव्यातील शेवटचा महोत्सव असल्याचे सांगितले.

सोशल मीडियात पोस्ट करत त्यांनी ही माहिती दिली आहे. त्यांच्या या पोस्टनंतर चर्चांना उधाण आले आहे.डिसेंबर २०२३ मधला गोव्यातला हा माझा शेवटचा सनबर्न. हा प्रवास इथेच संपतो. मी अनेकांचा आभारी आहे. या प्रवासात खूप कष्ट,भावना आणि बऱ्याच गोष्टींचा समावेश आहे.

मी मागील इतकी वर्षे या कार्यक्रमाचे आयोजन करू शकलो, याचा मला आनंद आहे. पण पुन्हा मी ते करू शकणार नसल्याचे दु:खही आहे, असे हरिंद्र सिंग यांनी सोशल मीडिया प्लॅटफॉर्म इन्स्टाग्रामवर लिहिले आहे.

त्यांच्या या पोस्टवर अनेकांनी दु:ख व्यक्त केले. त्यांच्या या निर्णयामागे नेमके काय कारण आहे, हे कळू शकले नाही.