Sunburn 2024 pravin arlekar controversy

धारगळ: विविध भागातून मोठ्या संख्येने देशी तथा विदेशी नागरिक सनबर्न महोत्सवात सहभागी होण्यासाठी पेडणे तालुक्यात आणि खास करून धारगळमध्ये दाखल झाले होते. धारगळ येथील राष्ट्रीय महामार्गालगत असलेल्या पठारावर सनबर्न महोत्सव आयोजित करण्यात आला. यासाठी भव्य रंगमंच घालण्यात आला. विद्युत रोषणाई तसेच डीजेच्या तालावर आज रात्री तरुणाईचे पाय थिरकले.

‘सनबर्न नको’ असा विरोध करणाऱ्या स्थानिकांना डावलून या ईडीएम फेस्टिव्हलला सुरुवातीला पंचायतीने परवानगी दिली आणि हा विरोध आणखी चिघळला. त्यानंतर हा प्रवास न्यायालयाच्या दिशेने वळला आणि आयोजकांना कायदेशीर परवानगी घेऊन फेस्टिव्हल करण्यास न्यायालयाने मान्यता दिली. अखेर सनबर्न आयोजकांना सरकारनेही सशर्त परवानगी दिली आणि मोठ्या गाजावाजात आजपासून धारगळमध्ये ‘सनबर्न’ फेस्टिव्हल सुरू झाला.

पेडण्याचे आमदार प्रवीण आर्लेकर यांनी सुरुवातीला स्थानिक नागरिकांसोबत सनबर्नला विरोध केला होता. मात्र, आता फेस्टिव्हलच्या आयोजनासाठी त्यांचे स्वागत करणारे बॅनर धारगळ आणि परिसरात झळकत आहेत. सामाज माध्यमांवर आर्लेकर यांच्या या भूमिकेवर तीव्र टीका होत असून, ‘लोकांच्या मताला किंमत किती?’ असा प्रश्न उपस्थित केला जात आहे.