Sonali Phogat Case : सोनाली फोगट हत्या प्रकरणात संशयित सुधीर संगवान आणि सुखविंदर सिंग यांच्या अडचणीत वाढ झाली आहे. दोघांनाही म्हापसा कोर्टाने आणखी दोन दिवसांची पोलिस कोठडी दिली आहे. आज गुरुवारी म्हापसा कोर्टात सोनाली फोगट प्रकरणी सुनावणी झाली, त्यावेळी कोर्टाने ही कोठडी वाढवली आहे.

हणजुण पोलिसांनी मंगळवारी झालेल्या सुनावणीवेळी कोर्टाकडे संशयितांची 4 दिवसांसाठी कोठडी मागितली होती मात्र कोर्टाने आरोपींना 2 दिवसांची कोठडी सुनावली होती. आज गुरुवारी पोलिसांनी दोन्ही आरोपींना पुन्हा कोर्टात हजर करत त्यांच्या वाढीव कोठडीची मागणी केली. कोर्टाने ती मान्य करत आरोपींची पोलीस कोठडी दोन दिवसांनी वाढवली आहे. याप्रकरणी म्हापसा कोर्टात 10 सप्टेंबर रोजी पुढील सुनावणी होणार असून दोन्ही आरोपींना पुन्हा कोर्टात हजर केलं जाणार आहे.

दरम्यान सोनाली फोगट मृत्यू प्रकरणाशी संलग्न असलेल्या कर्लीस रेस्टॉरंटचा चालक एडविन नुनिस यास म्हापसा अतिरिक्त व जिल्हा सत्र न्यायालयाने बुधवारी सशर्त जामीन मंजूर केला. यामध्ये संशयितला कर्लीस रेस्टॉरंटमध्ये जाता येणार नाही, ही महत्त्वाची अट घातली आहे. त्याशिवाय परवानगीशिवाय गोव्याबाहेर जाता येणार नाही व तपास कामात हस्तक्षेप करता येणार नाही या अटींचा समावेश आहे.

तसेच दत्तप्रसाद गावकर, रामदास माद्रेकार व एडविन नुनिस यांना पोलीस कोठडी देण्यात यावी, हा हणजूण पोलिसांनी केलेल्या मागणीचा अर्ज न्यायालयाने फेटाळला.