वास्को: फेरी पॉइंट, कुठ्ठाळी येथे झुआरी नदीजवळ चिखलाच्या दलदलीत अडकलेल्या एका व्यक्तीला वास्को अग्निशमन केंद्राच्या पथकाने यशस्वीरीत्या बाहेर काढले.

प्राप्त माहितीनुसार, एक व्यक्ती शनिवारी सकाळी कुठ्ठाळी फेरी धक्क्याजवळ मासेमारी करण्यासाठी पाण्यात उतरला असता तो चिखलात रुतला. त्याने अनेकवेळा वर येण्यासाठी प्रयत्न केला; पण त्याला जमले नाही.

जवळच असलेल्या लोकांनी त्याला वर काढण्यासाठी प्रयत्न केला; पण चिखलात घट्ट रुतल्याने त्यांनाही त्याला वर काढणे जमले नाही. त्यावेळी लोकांनी लगेच अग्निशमन दलाला फोन केला असता अग्निशमन दलाचे जवान घटनास्थळी दाखल झाले व प्रयत्नांची पराकाष्ठा करत त्या व्यक्तीला चिखलातून वर काढण्यात आले.