डिचोली: कठोर परिश्रम आणि आत्मविश्वासाच्या बळावर निश्चित ध्येय पादाक्रांत करता येते. विद्यार्थ्यांनी याचा विचार करून आत्मविश्वास आणि मेहनत घेऊन आपल्या आवडीच्या क्षेत्रात नाव कमवावे, असे आवाहन डिचोलीचे आमदार डॉ. चंद्रकांत शेट्ये यांनी केले. मुळगाव येथील ज्ञानप्रकाश उच्च माध्यमिक विद्यालयाच्या बक्षीस वितरण समारंभात डॉ. शेट्ये प्रमुख पाहुणे या नात्याने बोलत होते. याप्रसंगी ज्ञानप्रकाश शिक्षण संस्थेचे अध्यक्ष आणि माजी मंत्री पांडुरंग राऊत, प्राचार्य सेलिना डिमेलो, ज्ञानेश्वर कळंगुटकर, लक्ष्मीकांत परब आदी उपस्थित होते.

याप्रसंगी ज्ञानप्रकाश मंडळातर्फे माजी मंत्री पांडुरंग राऊत यांच्या हस्ते शाल, श्रीफळ आणि भेटवस्तू देऊन आमदार डॉ. चंद्रकांत शेट्ये यांचा सत्कार करण्यात आला. डॉ. शेट्ये यांनी ज्या क्षेत्रात पाऊल ठेवले आहे, त्यात यश प्राप्त केले आहे, असे गौरवोदगार श्री. राऊत यांनी यावेळी काढले. प्राचार्य डिमेलो यांनी स्वागत केले.