मडगाव: आगाळी फातोर्डा येथे पूर्व बगल रस्त्याजवळ आदर्श चोदणकर रेसिडेन्सी आहे. या निवासी प्रकल्पाच्या खुल्या जागेत बेकायदेशीररित्या मोठ्या प्रमाणावर गॅस सिलिंडर एका वाहनात घालून साठवून ठेवण्यात आलेत. येथून अवघ्या शंभर मीटर अंतरावर पेट्रोल पंप असून त्यामुळे सिलिंडर साठवून ठेवणे म्हणजे आपत्तीला आमंत्रण देण्यासारखे आहे. या संबंधी प्रकल्पातील रहिवाशांनी पोलिस आणि प्रशासन या दोघांकडेही तक्रार करूनही त्याकडे फक्त डोळेझाक होत आहे.

कारवाई नाहीच: जागेपासून अवघ्या 200 मीटर अंतरावर फातोर्डा पोलीस स्थानक आहे. या संबंधात तक्रार करून दोन महिने उलटूनही कारवाई न झाल्याचा आरोप नागरिकांनी केला.

निवासी वस्तीत परवानगी दिलीच कशी?

पूर्वी इमारतीच्या तळमजल्यावर एका उद्योजकाचा गाड्यांचे शोरूम व गॅस बुकिंग कार्यालय सुरू होते. पण बँकेने 2021 मध्ये या ठिकाणी सील ठोकले. यानंतर त्या व्यावसायिकाने इमारतीसमोरील उघड्या जागेत व्यवसाय सुरू केला. येथे एक वाहन पार्क करून त्यात शेकडो गॅस सिलिंडर साठवून ठेवले जातात. निवासी प्रकल्पाच्या समोर ज्वालाग्राही पदार्थ साठवण्याची परवानगी कशी दिली गेली असा सवाल उपस्थित होत आहे.