Sanjivani Sugar Factory: संजीवनी साखर कारखाना पुन्हा सुरू करून ऊस उत्पादक शेतकऱ्यांना दिलासा देण्यात अपयशी ठरल्याबद्दल काँग्रेसचे नेते गिरीश चोडणकर यांनी आज मुख्यमंत्री डॉ. प्रमोद सावंत यांच्या नेतृत्वाखालील भाजप सरकारवर जहरी टीका केली. हे सरकार बहुजनविरोधी असल्याचा आरोप केला.

आता भाजप नेते फक्त चुकीची माहिती पसरवून मते मिळवण्याचा प्रयत्न करतात. शेतकऱ्यांना योजना देण्याचे आणि त्यांच्या हिताचे काम करण्याबाबतही ते बोलतात. तथापि, गोव्यात शेतकऱ्यांना कोणतीही आशा उरलेली नाही आणि म्हणून त्यांना आंदोलन करण्यास भाग पाडले जाते, असे चोडणकर यांनी नमूद केले.

भाजप सरकार बहुजनविरोधी आहे, हे त्यांच्या प्रत्येक कृतीतून स्पष्ट होते. शेजारील राज्यांना ऊस विकण्याची सुविधा देण्यातही ते अपयशी ठरले आहेत, असे चोडणकर यांचे म्हणणे आहे.

पर्रीकरांच्या आश्‍वासनाचे काय?

केंद्रीय मंत्री नितीन गडकरी आणि स्व. मनोहर पर्रीकर यांनी २०१७ मध्ये संजीवनी साखर कारखान्याला उसाचे उपउत्पादन घेऊन नवीन जीवन देण्याचे आश्वासन दिले होते. पण त्या आश्वासनाचे काय झाले? शेतकऱ्यांच्या हितासाठी काम करण्याऐवजी याच सरकारने २०२० मध्ये कारखाना बंद केला आणि तेव्हापासून शेतकऱ्यांचे हाल होत आहेत, असा आरोप चोडणकर यांनी केला.