Vocational Teacher Recruitment

पणजी: राज्यात विविध उच्च माध्यमिक विद्यालयांमध्ये व्यावसायिक शिक्षकांची नेमणूक ही कंत्राटी पद्धतीनेच केली जाणार असल्याचा निर्णय मंत्रिमंडळ बैठकीत घेण्यात आला आहे. यासंदर्भातील अधिसूचना शिक्षण संचालनालयाने प्रसिद्ध केली आहे.

पूर्वी पाच वर्षे कंत्राटी तत्त्वावर कार्यरत असणाऱ्या व्यावसायिक शिक्षकांना कायमस्वरूपी रूजू करण्याचा निर्णय होता आता त्यात बदल करून कंत्राटी पद्धतीनेच व्यावसायिक शिक्षकांची भरती केली जाणार आहे. जुन्या निर्णयानुसार, ११ ऑगस्ट २०१५ पूर्वी ज्या व्यावसायिक शिक्षकांना कंत्राटी पद्धतीने रूजू होऊन पाच वर्षे पूर्ण झाली आहेत, अशा शिक्षकांना कायमस्वरूपी सेवेत रूजू करून घेण्यात येणार आहे. २०१५ पूर्वी कंत्राटी पद्धतीने रूजू झालेले एकूण २१ शिक्षक असून ते आता कायमस्वरूपी होतील.

१९९८ साली व्यावसायिक शाखेची सुरूवात करण्यात आली होती. तेव्हापासून आतापर्यंत सरकारची व्यावसायिक शिक्षणाची उद्दिष्ट पूर्ण झाली आहेत.

२०१६ साली झालेल्या मंत्रिमंडळ बैठकीत जे व्यावसायिक शिक्षक पाच वर्षे कंत्राटी पद्धतीने कार्यरत आहेत त्यांना कायमस्वरूपी सेवेत रूजू करण्याचा निर्णय घेण्यात आला होता आता या निर्णयात बदल करण्याचा निर्णय २८ ऑगस्ट रोजी झालेल्या मंत्रिमंडळ बैठकीत घेण्यात आला आहे.

दरम्यान, जे व्यावसायिक शिक्षक २०१५ पूर्वी कंत्राटीतत्त्वावर रुजू झालेले आहेत, त्यांनाच कायमस्वरुपी पद्धतीने रुजू करण्यात येणार आहे. आता सर्व व्यावसायिक शिक्षकांची भरती ही कंत्राटी पद्धतीनेच केली जाणार असल्याचे शिक्षण संचालक शैलेश झिंगडे यांनी अधिसूचनेत म्हटलेआहे.