पणजी: राज्याचे वित्तीय आरोग्य कसे आहे हे आज वित्तमंत्री या नात्याने मुख्यमंत्री डॉ. प्रमोद सावंत यांनी जाणून घेतले. वित्त सचिव डॉ. व्ही. कांदावेलू यांच्यासह वित्त खात्यातील वरिष्ठ अधिकारी आणि इतर खाते प्रमुख मंत्रालयात झालेल्या या बैठकीत सहभागी झाले होते. केंद्रीय योजनांचा कितपत लाभ घेण्यात विविध खाती यशस्वी झाली याविषयी मुख्यमंत्र्यांनी विचारणा केली.

दोन महिन्यांपूर्वी मुख्यमंत्र्यांनी केंद्रीय योजनांचा लाभ घेण्‍यासाठी प्रस्ताव तयार करून ते दिल्लीतील निवासी आयुक्तांच्या माध्यमातून केंद्रीय मंत्रालयात सादर करावेत अशी सूचना मुख्यमंत्र्यांनी केली होती. त्या योजनांचा लाभ राज्याला मिळण्यासाठी पाठपुरावा करण्याचे वेळापत्रकही तयार करण्यास सांगण्यात आले होते.

केंद्र सरकारकडून वस्तू व सेवा करातील वाटा राज्याला मिळतो, त्याशिवाय इंधनावरील मूल्यवर्धित कर आणि मद्यावरील अबकारी कर मिळतो. त्याआधारे राज्यशकट हाकावे लागते. महसुलाचा बऱ्यापैकी ६२ टक्के वाटा हा वेतन व निवृत्ती वेतनावर खर्च होतो. त्यातच या महिन्यात बोनस व दिवाळीमुळे लवकर द्यावयाच्या वेतनामुळे सरकारी तिजोरीवर भार पडला आहे.