Vasco-Belgaum Railway: वास्को-बेळगाव या मार्गावर दररोज प्रवासी रेल्वे सुरू करावी अशी मागणी राज्यसभा खासदार सदानंद शेट तानावडे यांनी आज सभागृहात केली. दक्षिण पश्चिम रेल्वेच्या माध्यमातून ही सेवा सुरू करण्याची गरज त्‍यांनी व्यक्त केली.

राज्यसभा खासदार तानावडे यांनी वरील गरजेवर जोर देऊन, वास्को आणि बेळगावदरम्यान विश्वासार्ह आणि कार्यक्षम रेल्वे कनेक्शनची मागणी पूर्ण करण्यासाठी रेल्वेमंत्र्यांनी हस्तक्षेप करण्याची मागणी त्यांनी केली.

गोवा आणि बेळगाव यांच्यातील आर्थिक संबंधांवर प्रकाश टाकताना ते म्हणाले की, या दोन प्रदेशांमधील व्यापार, वाणिज्य आणि वैयक्तिक प्रवास सुलभ करण्यासाठी नियमित आणि अखंड रेल्वेसेवा आवश्यक आहे.

बेळगाव विविध उपक्रमांसाठी एक महत्त्वाचे केंद्र म्हणून काम करत असून, गोव्याशी विश्वसनीय वाहतूक दुवा गरजेचा आहे.

असंख्य गोमंतकीय व्यवसाय, शिक्षण, वैद्यकीय आणि खरेदी यासारख्या विविध कारणांसाठी बेळगाव येथे वारंवार जातात. या मार्गाचे धोरणात्मक महत्त्व ओळखून रेल्वेमंत्र्यांना लोंढा आणि दूधसागर येथे संभाव्य थांब्यांसह दैनंदिन रेल्वे सेवा सुरू करण्याबाबत विचार करावा. त्‍यामुळे प्रवाशांची कनेक्टिव्हिटी आणि कार्यक्षमता वाढेल असे सांगून त्यांनी दूधसागर धबधब्याच्या पर्यटन क्षमतेवर प्रकाश टाकला.