Goa Congress News: सेंट फ्रान्सिस झेवियर यांच्‍या पवित्र अवशेषांची जनुकीय चाचणी करण्याची मागणी करून वादात सापडलेले सुभाष वेलिंगकर यांना पळून जाण्यास सरकारनेच मदत केली आहे, असा आरोप कॉंग्रेस नेत्यांनी पत्रकार परिषदेत केला. यावेळी कॉंग्रेसच्या राष्ट्रीय सचिव प्रभारी डॉ. अंजली निंबाळकर, कॉंग्रेस प्रदेशाध्यक्ष अमित पाटकर, विरोधी पक्षनेते युरी आलेमाव, आमदार ॲड. कार्लुस फेरेरा होते.

निंबाळकर म्हणाल्‍या, एक व्यक्ती बेपत्ता होते आणि पोलिसांना सापडू शकत नाही, असे होऊच शकत नाही. वेलिंगकर यांना राज्याबाहेर, देशाबाहेर पळून जाण्यास सरकारनेच मदत केली आहे. द्वेषपूर्ण विधानांची राज्य सरकारने स्वेच्छा दखल घेतली पाहिजे, असा निवाडा सर्वोच्च न्यायालयाने दिला असताना केवळ एफआयआर नोंदवण्यासाठी सरकार जनक्षोभाची वाट पाहात राहिले. वेलिंगकर यांच्या विधानामुळे सामाजिक दुही निर्माण झाली आहे.

डिचोली पोलिसांनी बजावली तिसऱ्यांदा नोटीस

डिचोली पोलिसांनी शुक्रवारी (४ ऑक्टोबर) सुभाष वेलिंगकर यांच्याविरोधात धार्मिक सलोखा बिघडवल्याच्या प्रकरणात गुन्हा नोंद केला होता. चौकशीसाठी दोनवेळा नोटीस बजावूनही ते उपस्थित राहिले नव्हते. सत्र न्यायालयाने त्यांना या नोटिशीनुसार चौकशीस सामोरे जाण्याचे तसेच तपासकामात सहकार्य करण्याचे निर्देश देऊनही ते उपस्थित राहिले नाहीत. त्यामुळे पोलिसांनी त्यांना तिसरी नोटीस बजावून आज ( १० ऑक्टोबर) सकाळी चौकशीस उपस्थित राहण्यास सांगितले आहे.