मडगाव: पोलीस अधिकाऱ्यांना सरकारने आपल्या पैशांनी फोन उपलब्ध करून दिले असले तरी दक्षिण गोव्यातील काही पोलीस निरीक्षकांना लोकांकडून येणाऱ्या फोनाशी वावगे आहे का, असे वाटण्याजोगी परिस्थीती निर्माण झाली असून काही अधिकारी लोकांचे फोनच घेत नाहीत, अशा तक्रारी वाढत आहेत.

मडगाव पोलीस स्थानकाचे निरीक्षक तुळशीदास नाईक आणि कोलवाचे पोलीस निरिक्षक सतीश पडवळकर या दोन अधिकाऱ्यांबाबत या तक्रारी जास्त आहेत. यासंबंधी दक्षिण गोव्याच्या पोलीस अधीक्षक सुनीता सावंत यांच्याकडेही या तक्रारी पोहोचल्या आहेत. उल्लेखनिय म्हणजे, हे अधिकारी पत्रकारांच्या फोनलाही उत्तर देत नाहीत.

यापूर्वी गोव्याचे माजी पोलीस महासंचालक जसपाल सिंग हे मडगाव पोलीस मुख्यालयात आले असता त्यांच्याकडे काही पत्रकारांनी तक्रारही केली होती. त्यानंतर पोलीस अधीक्षक सुनीता सावंत यांच्याकडे झालेल्या वार्तालापाच्या वेळीही पत्रकारांनी त्यांच्या कानावर ही बाब घातली होती. हे अधिकारी लोकांचे फोन घेत नसल्यामुळे लोकांच्या अडचणी वाढल्या असून प्रशासनाने यावर काहीतरी उपाय काढावा, अशी मागणी नागरिक करीत आहेत.