South Goa: प्रजासत्ताक दिन कार्यक्रमासाठी सरकारी कर्मचाऱ्यांकडून 1 हजार रुपयांची वर्गणी जमा करण्याचा वादग्रस्त आदेश जारी करणाऱ्या दक्षिण गोव्याच्या जिल्हाधिकारी ज्योती कुमारी यांची एका आदेशान्वये तडकाफडकी बदली करण्यात आली असून त्यांच्या जागी आश्विन चंद्रू ए. यांची नियुक्ती करण्यात आली आहे.

काल सायंकाळी उशिरा पर्सनल खात्याचे अव्वल सचिव एहांत सावंत यांनी राज्यपालांच्या वतीने हा आदेश जारी केला.

ज्योती कुमारी यांची सध्या गोवा मनोरंजन सोसायटीच्या मुख्य कार्यकारी अधिकारी म्हणून नियुक्ती करण्यात आली आहे. कुमारी यांनी प्रजासत्ताक दिनाचा साेहळा साजरा करण्यासाठी सर्व कर्मचाऱ्यांकडून एक हजार रुपयांची वर्गणी गोळा करण्याचा आदेश जारी केला होता.

हा आदेश समाज माध्यमांवर व्हायरल झाल्यावर मोठा गदारोळ माजला होता. महसूलमंत्री बाबूश मोन्सेरात यांनी या प्रकाराबद्दल तीव्र नाराजी व्यक्त करताना ज्योती कुमारी यांच्याकडून स्पष्टीकरण मागितले होते. प्रजासत्ताक दिनाचा सोहळा 26 रोजी पार पडल्यावर काल तडकाफडकी हा आदेश जारी करण्यात आला.