फातोर्डा: सोनसोडो कचरा यार्डवर काही दिवसापूर्वी आग लागून झालेल्या वीज साहित्याच्या दुरुस्तीचे काम आणि कोसळलेल्या भिंतीच्या कामाला सुरवात येत्या आठवड्यापासून करण्यात येणार असल्याचे मडगाव नगरपालिकेचे नगराध्यक्ष लिंडन परेरा यांनी सांगितले.

येथे झालेल्या नुकसानीची पाहणी करण्यात आली तेव्हा मडगाव नगरपालिकेचे अभियंते, जिल्हा पालिका संचालक, जी सुडाचे अधिकारी व इतर उपस्थित होते. अधिकाऱ्यांनी दोन दिवसापूर्वी पाहणी केली होती आणि येथील परिस्थितीच्या नुकसानीचा अंदाज घेतला होता.

या कचरा यार्डवर बेलिंग मशीन, वीज ट्रान्सफॉर्मर सहित इतर उपकरणे यांना आग लागून येथील एकंदरीत 40 लाख रुपयांचे नुकसान झाले होते तसेच कचरा प्रक्रिया करण्यात येत असलेल्या संरक्षण भिंत कोसळून या नुकसानीत आणखी भर पडली होती.

कोसळलेल्या भिंतीचा अहवाल प्राप्त झाल्यानंतर तो पालिका संचालकांना सादर करण्यात येणार आहे. यानंतर येथील दुरुस्तीच्या कामाला प्रत्यक्ष सुरवात करण्यात येणार असल्याचे नगराध्यक्ष परेरा यांनी सांगितले.