सासष्टी: सोनसोडो कचरा प्रकल्पात आज नारळाच्या करवंट्या फोडण्याच्या यंत्राचे उद्‍घाटन आमदार दिगंबर कामत यांच्या हस्ते करण्यात आले. याप्रसंगी नगराध्यक्ष दामोदर शिरोडकर, उपनगराध्यक्ष बबिता नाईक, मुख्याधिकारी मेल्विन वाझ, नगरसेवक व स्वच्छता समितीचे चेअरमन कामिल बार्रेटो व इतर नगरसेवक उपस्थित होते.

हे खास डिझाईन केलेले मशीन असून त्याची किंमत १३ लाख रुपये आहे. या मशीनमुळे नारळाच्या करवंट्याचा बारीक पावडर करणे शक्य होईल. त्याचा वापर खत म्हणून वापरता येईल. या मशीनमुळे करवंट्यांच्या कचऱ्याचा प्रश्न सुटणार आहे. या मशीनमुळे करवंट्या, पानांची योग्य विल्हेवाट लावणे शक्य होईल, असे आमदार दिगंबर कामत यानी सांगितले.

कामत म्हणाले, अशाच प्रकारचे फिरते मशीन आणण्याचा आमचा प्रयत्न आहे. त्यामुळे जिथे करवंट्यांचा किंवा कचऱ्याच्या राशी आहेत, तिथे हे मशीन नेऊन त्याची विल्हेवाट लावणे शक्य होईल. हा कचरा सोनसोडो कचरा प्रकल्पात आणण्याची गरज भासणार नाही.

दोन मशीन उपलब्ध!

सोनसोडो कचरा प्रकल्पातील हे अशा प्रकारचे दुसरे मशीन आहे. यापूर्वी नारळाच्या पानाची विल्हेवाट लावणारे मशीन बसविण्यात आले होते. या मशीनला गोवा एनर्जी डेव्हलपमेंट एजन्सीची मान्यता आहे. एका तासात ५०० किलो नारळाच्या कचऱ्याची विल्हेवाट लावण्याची क्षमता आहे.