Som Yag Yadnya 2023 Festival Goa

सृष्‍टीचक्रातील सामाजिक आध्‍यात्‍मिक, वैचारिक वातावरण निकोप व शुद्ध व्‍हावे, या उदात्त हेतूने गोमन्तक-सकाळ माध्यम समूहातर्फे म्‍हापसा येथे विश्वाटी विश्वेश्वर देवस्थान परिसरात ५ ते १० फेब्रुवारी या कालावधीत सोमयाग यज्ञ उत्सवाचे आयोजन करण्‍यात आले आहे. समस्‍त गोमंतकीयांनी या सोहळ्यात सहभागी व्‍हावे व मांगल्‍य, प्रसन्‍नतेची अनुभूती घ्‍यावी, असे आवाहन अग्निहोत्री सुहोता दीपक आपटे (दीक्षित) यांनी केले आहे.

‘गोमन्‍तक टीव्‍ही’वर खास मुलाखतीत त्‍यांनी सोमयाग विषयक अनेक कंगोरे उलगडले. व्‍यक्‍तिगत स्‍वार्थ नव्‍हे, विश्‍‍व कल्‍याणासाठी दुर्मीळ सोमयाग यज्ञ होत आहे. यज्ञामुळे पंचमहाभूतांना बळकटी देण्‍याच कार्य घडणार आहे. गोव्‍यात यज्ञाची जुनी परंपरा आहे. त्‍याचे उत्‍थान होणार आहे. गोव्‍याची काही वैशिष्‍ट्‍यांपुरती सीमित ओळख नसून, आध्‍यात्‍मिक क्षेत्रातही गोव्‍याचा विशेष लौकिक आहे. सोमयाग यज्ञ उत्‍सवामुळे त्‍याला अधिक झळाळी लाभेल, असे आपटे म्‍हणाले.

दहा दिवसांचा उपवास

यजमानपद अग्निहोत्री सुहोता दीपक आपटे (दीक्षित) हे सपत्‍नीक भूषविणार आहेत. ज्‍यांच्‍याकडून दिवसातील २४ तास अग्‍निहोत्र सेवा होते, तसेच अन्‍य कठोर निकष पार पडले जातात, त्‍यांनाच सोमयाग यज्ञ करण्‍याचा अधिकार मिळतो. संबंधित व्‍यक्‍तींना दहा दिवस केवळ पाणी व लिंबूरसावर राहावे लागते. या दिवसांत भोजन वर्ज्य असते.

यज्ञाची वैशिष्‍ट्‍ये -

1. यज्ञस्थळी तीन वेदांसह सामवेदातील गायनही होते.

 2. सहभागासाठी ज्ञाती, धर्माचे कोणतेही बंधन नाही

 3. सकाळी ७ ते सायंकाळी ७.३० यज्ञ चालेल. दुपारी महाप्रसाद.

 4. यज्ञाचा अर्थ, उपयुक्‍तता उपस्‍थितांना सांगण्‍यात येणार.

 5. कढवलेले तूप, दूध यांच्‍या मिश्रणातून निघतात २५ फुटी ज्‍वाळा

 6. यज्ञाच्‍या परिणामांचा शास्‍त्रीय कसोटीवर होणार अभ्‍यास