पणजी : ऑक्टोबरमध्ये उद्‍घाटन झालेली सौरऊर्जा बोटसेवा आता लवकरच सुरू होणार आहे. पणजी ते चोडणदरम्यान ही बोट चालणार असून पणजीतील तरंगत्या जेटीवर चार्जिंगची सुविधा तयार केली जात आहे, तसेच चोडण येथे याच महिन्यात तरंगती जेटी आल्यानंतर सेवा सुरू केली जाईल, अशी माहिती बंदर कप्तान खात्याने ‘दै.गोमन्तक’ला दिली.

केंद्रीय जहाज उद्योग संचालनालयाच्या मार्गदर्शक तत्त्वांनुसार प्रत्येक बंदरावर इलेक्ट्रिक चार्जिंग सुविधा असणे आवश्‍यक आहे. जेणेकरून, जहाज आणि बोट्सना याचा लाभ होईल. त्यानुसार बंदर कप्तान खात्याअंतर्गत येणाऱ्या तरंगत्या जेटींवर इलेक्ट्रिक चार्जिंग, पाणीपुरवठा आणि इतर सुविधा उपलब्ध करण्यासाठी तरतूद केली आहे. पर्यावरणपूरक प्रकल्पांना प्रोत्साहन दिले जात आहे, असे खात्याच्या अधिकाऱ्यांनी सांगितले आहे.

४.२ कोटी खर्च

सौरऊर्जा बोट बांधण्यासाठी एकूण ४.२ कोटी रुपये खर्च आला आहे. बोटीमध्ये दोन इलेक्ट्रिक मोटर असून प्रत्येक मोटरची क्षमता १३० किलो वॅट असल्याने बॅटरीद्वारे ४० किलो वॅट प्रतितास ऊर्जा मिळणार आहे. तर सौरऊर्जेतून २० किलो वॅट इंजिनला ऊर्जा पोहोचल्यानंतर ते चालणार आहे. तसेच आपत्कालीन परिस्थितीत इलेक्ट्रिक जनरेटर सक्रिय होईल. बोटीची क्षमता ६० प्रवाशांना नेण्याची आहे.

सौरऊर्जेवर चालणारी ही अत्याधुनिक बोट असून नोव्हेंबरमध्ये सुरू होणार आहे. पणजी-चोडण जलमार्गही चालणार असल्याने पर्यटक तसेच स्थानिकांना सहलीचा आनंद घेता येईल. सध्या चोडण येथे तरंगत्या जेटीसाठी काही साहित्य मागविले असल्याने थोडा विलंब झाला आहे. लवकरच ही सेवा सुरू होईल.

- कॅ. जेम्स ब्रागांझा, बंदर कप्तान