फोंडा: येथून एक धक्कादायक घटना समोर आली आहे. शिकवणी घेणाऱ्या शिक्षकाने एका अल्पवयीन मुलाला अश्लील व्हिडिओ पाठवल्याचा प्रकार उघडकीस आला आहे. मुलाच्या पालकांनी याप्रकरणी पोलिसांत तक्रार दाखल केल्यानंतर संशयित शिक्षकाला अटक करण्यात आली आहे.

मिळालेल्या माहितीनुसार, एका व्यक्तीने १३ वर्षीय अल्पवयीन मुलाला अश्लील व्हिडिओ व्हॉट्सअॅपवर पाठवला. मुलाला संबधित व्हिडिओ पालकांना दाखवल्यानंतर पालकांनी याबाबत पोलिसांत तक्रार दाखल केली. पालकांनी दाखल केलेल्या तक्रारीच्या आधारे पोलिसांनी संशयित व्यक्तीला ताब्यात घेतले.

संशयिताची चौकशी केली असता त्याने त्याला मुली नाही तर मुले आवडातात असे सांगितले. तसेच, असे (अश्लील) बोलणे, मेसेज पाठवणे त्याला आवडते असेही त्याने पोलिसांना सांगितले. धक्कादायक बाब म्हणजे हा संशयित व्यक्ती खासगी शिकवणी घेतो, असे तपासात उघडकीस आले आहे.

दरम्यान, संशयित व्यक्ती आणि मुलाची ओळख देखील नसल्याचे तपासात समोर आले आहे. मुलाच्या पालकांनी याप्रकरणी संशयिताविरोधात कठोर कारवाई करण्याची मागणी केली आहे. शिक्षणमंत्री तथा मुख्यमंत्री प्रमोद सावंत यांनी याप्रकरणात लक्ष घालावे, अशी मागणी देखील मुलाच्या पालकांनी केली आहे. भविष्यात काही चुकीची घटना घडू नये म्हणून योग्य खबरदारी घ्यावी, असेही मुलाच्या पालकाने म्हटले आहे.