Tree Collapses : मार्ना-शिवोली येथे सोमवारी संध्याकाळी सरीता च्यारी यांच्या कौलारू घरावर भलेमोठे आंब्याचे झाड वादळी वाऱ्याने कोसळल्याने घरात शिकवणीसाठी आलेले चार विद्यार्थी अंगावर कौले पडल्याने जबर जखमी झाले.

दरम्यान, ही मुले अग्निशमन दलाच्या जवानांनी झाड हटवेपर्यंत घरातच अडकून पडली होती.जखमींवर स्थानिक आरोग्य केंद्रात प्राथमिक उपचारांनंतर घरी पाठवण्यात आले. सोमवारी सायंकाळी घडलेल्या या घटनेमुळे विद्यार्थी तसेच पालकांत भीतीचे वातावरण पसरले.

दरम्यान, संध्याकाळी उशिरा घडलेल्या या घटनेची माहिती म्हापसा अग्निशमन दलाला स्थानिक प्रभागाचे पंच सदस्य विल्यम फर्नांडिस यांनी तात्काळ दिल्याने पंधरा मिनिटांत दलाचे जवान घटनास्थळी दाखल झाले व त्यांनी घरावर पडलेले आंब्याचे झाड यंत्राने कापून बाजूला केले व घरात अडकलेल्या विद्यार्थ्यांची सुटका केली.

सरीता च्यारी यांच्या घरावर आंब्याचे झाड पडल्याची माहिती मिळताच तत्काळ म्हापसा अग्निशमन दलाला माहिती दिली व जवानांनी तत्काळ घटनास्थळी येऊन मदतकार्य केले. घरात जवळपासचे शालेय विद्यार्थी शिकवणीसाठी येत होते. त्यापैकी एक-दोन विद्यार्थी डोक्यावर कौले पडल्याने जखमी झाले. परंतु त्यांच्यावर तत्काळ उपचार करून घरी पाठवण्यात आले.

विल्यम फर्नांडिस (स्थानिक पंच सदस्य)

माझी सहा वर्षांची मुलगी सरीता च्यारी यांच्याकडे ट्युशनसाठी जाते. या घटनेत पाठीवर कौले पडल्याने ती किरकोळ जखमी झाली. शिवोलीच्या प्राथमिक आरोग्य केंद्रात तिच्यावर उपचार करून तिला घरी पाठवले आहे. तथापि, घोलान -शिवोली येथील अन्य एक विद्यार्थिनी या घटनेत जबर जखमी झाल्याचे ऐकून वाईट वाटले.

लवू धारगळकर (पालक)