Goa Shack Policy: अखेर आज मंगळवारपासून शॅकवाटप प्रक्रिया सुरू झाली. सोडत पद्धतीने सुरू झालेल्या या प्रकियेत भाग घेण्यासाठी उत्तर गोव्यातील शेकडो शॅकमालक सकाळपासूनच येथील पर्यटन भवनाबाहेर जमले होते. सोडतीची सुरूवात सकाळी 10 वाजता गावनिहाय व प्रवर्गनिहाय शॅकवाटपाने झाली.

उत्तर गोव्यातील कळंगुट, कांदोळी, केरी, हरमल, मांद्रे, मोरजी, वझरांत, हणजूण, वागातोर, शिरदोन, शापोरा या गावांच्या अनुक्रमाने शॅकवाटप सोडतीची प्रक्रिया होणार आहे. या प्रक्रियेत पारदर्शकता येण्यासाठी सोडत पद्धत अवलंबिण्यात आली. त्यात सहभागी होण्यासाठी शेकडो शॅकमालकांनी सकाळपासूनच पणजीत गर्दी केली होती.

पिशवीतून काढले गेले टोकन क्रमांक

पर्यटन विभागातील अधिकाऱ्यांनी 'हावजी गेमद्वारे केलेल्या रॉकवाटप सोडतीचे स्पष्टीकरण दिले. त्या अनुषंगाने कोणीही व्यक्ती कापडी पिशवीतून टोकन क्रमांक काढेल आणि तो क्रमांक असलेल्या व्यक्तीला बोलावून त्याची स्वाक्षरी घेतली जाईल. ही प्रक्रिया प्रवर्गनिहाय व गावनिहाय करण्यात आली.