Mauvin Godinho : गोव्यात दारुचे सेवन करणाऱ्यांना सुखरुप घरी पोहोचवण्याची सर्वस्वी जबाबदारी संबंधित बारमालकाची आहे, असं वक्तव्य मंत्री मॉविन गुदिन्हो यांनी केलं आहे. यावर कायदेशीर तरतुदींची तपासणी करण्यासाठी आणि प्रभावी अमलबजावणीसाठी मुख्यमंत्र्यांशीही चर्चा करणार असल्याचं गुदिन्हो यांनी म्हटलं आहे. गुदिन्होंच्या या वक्तव्याची सध्या चर्चा सुरु झाली आहे.

गोव्यात पर्यटनासाठी मोठ्या प्रमाणावर पर्यटक दाखल होत असतात. यातील बहुतांश पर्यटक गोव्यात मद्य स्वस्त असल्यामुळे मद्यपान करुन वाहन चालवतात. गोव्यात सध्या अपघातांचं प्रमाण कमालीचं वाढलेलं आहे. या अपघातांना प्रामुख्याने ड्रंक अँड ड्राईव्ह हे कारण असल्याचंही समोर आलं आहे. त्यामुळे वाहतूक मंत्री मॉविन गुदिन्हो यांनी आता या सगळ्याचा भार बारच्या मालकांवरच टाकण्याचं सूतोवाच केलं आहे. असं असलं तरीही गुदिन्होंच्या या मोहीमेला बार मालकांकडून सुरुंग लागण्याची शक्यता आहे. बार मालक याला विरोध करण्याची दाट शक्यता आहे.

दरम्यान दारु पिऊन वाहन चालवणाऱ्यांविरोधात सध्या गोव्यात कडक कारवाई सुरु आहे. वाहतूक पोलिसांनी काही महिन्यांपूर्वी मद्य घेऊन वाहन चालविणाऱ्यांविरुद्ध धडक मोहीम सुरू केली होती. अनेकदा अपघात हे मद्याच्या नशेत होत असल्याने पोलिसांनी वाहनचालकांची अल्कोमीटर चाचणी सुरू केली होती. त्यानंतर पुन्हा केलेल्या मोहिमेत 1011 जण आढळून आले आहेत. या गुन्ह्यासाठी कैदेची जास्तीत जास्त सहा महिने शिक्षा तसेच दहा हजार रुपये दंडात्मक कारवाई आहे.

मद्यप्राशन करून वाहने चालवताना आढळून आल्यास त्याच्याविरुद्ध कारवाई करून प्रकरण न्यायालयाकडे पाठवण्यात येते. शिक्षा व दंडाची कारवाई देण्याचा अधिकार न्यायालयाला आहे. वाहनचालकांनी सीट बेल्ट न लावल्याप्रकरणीची 676 प्रकरणे नोंद झाली आहेत. भरधाव वेगाने वाहने चालविल्याप्रकरणी 701 प्रकरणे नोंद झाली आहेत. अजूनही चालक सीट बेल्ट घालत नाहीत. रस्ता अपघातावेळी हेल्मेट नसल्याने मद्यप्राशन करून वाहन चालवणे तसेच भरधाव वाहन हाकणे ही अपघाताला निमंत्रण देणारी आहेत. त्यामध्ये अनेकांना मृत्यूलाही सामोरे जावे लागले आहे.