म्हापसा: सायपे, मार्रा-पिळर्ण येथे १० वर्षी़य शाळकरी मुलीचा विनयभंग केल्याप्रकरणी जालम रामदयाळ महोर (वय ५२ वर्षे, मूळ मध्य प्रदेश) या सुरक्षा रक्षकाला पर्वरी पोलिसांनी अटक केली. पीडित मुलगी संशयित नोकरी करत असलेल्या व्हिलामधील केअरटेकरची मुलगी आहे.

ही घटना बुधवारी रात्री नऊच्या सुमारास घडली. संशयिताने मुलीला आपल्याकडे बोलावले आणि तिचा विनयभंग केला. हा प्रकार गुरुवारी पीडितेने आई-वडिलांच्या कानी घातला. त्यानंतर मुलीच्या आईने पोलिसांत तक्रार नोंदवली.

या तक्रारीच्या आधारे पोलिसांनी संशयिताला पकडून अटक केली. संशयिताविरुद्ध पोलिसांनी भारतीय न्याय संहितेच्या ७४ व ७५, पोक्सो कायदा कलम ८ व १२ आणि गोवा बाल कायदा कलम ८ अंतर्गत गुन्हा नोंदवला आहे.