मडगाव : खलाशांसाठीची पेन्शन योजनेची मुदत डिसेंबरमध्ये संपलेली असली तरी खलाशांच्या खात्यामध्ये पेन्शनची रक्कम जमा केली नसल्याने खलाशी चिंतित झाले आहेत. जानेवारी महिन्यात या पेन्शन योजना वाढीसाठी सरकारने अधिसूचना काढली खरी, मात्र आचारसंहितेमुळे त्याची अंमलबजावणी होऊ शकली नाही. (Seaferer in Goa News Updates)

गोव्याचे (Goa) अनिवासी भारतीय कमिशनचे आयुक्त नरेंद्र सावईकर यांच्याशी संपर्क साधला तेव्हा त्यांनी सांगितले, की काही जणांनी कदाचित जीवन प्रमाणपत्र दिले नसल्याने त्यांच्या खात्यात रक्कम जमा झाली नसेल. तसेच निवडणुकीसाठी (Election) लागू केलेली आचारसंहिता मागे घेतल्यानंतर पेन्शनच्या रकमेसाठी तरतूद केली जाईल, असेही सावईकर यांनी स्पष्ट केले.

दरम्यान गृह खात्याने खलाशी पेन्शन योजनेत अधिसूचनेद्वारे वाढ केली आहे. पण गृह खात्याने पेन्शन रक्कम खलाशांच्या खात्यात रक्कम जमा केली नाही. निवृत्त खलाशी व काही जणांच्या विधवा बॅंकामध्ये खेपा घालत असल्याचं चित्र आहे. काही निवृत्त खलाशी व विधवांनी सरकारकडे कायस स्वरुपी पेन्शन योजनेसाठी मागणी केली आहे. पण सरकारने सहा महिन्यासाठी तयार केलेली योजना एका वर्षासाठी वाढवली आहे.

खलाशी पेन्शनचा मुद्दा विधानसभा निवडणुकीमध्ये (Goa Assembly Election) महत्वाचा ठरला. खास करुन वेळ्ळी, कुंकळ्ळी, बाणावली मतदारसंघात काँग्रेसने कायमस्वरुपी पेन्शन योजना सुरु करण्याचे आश्वासन दिल्याची माहिती आहे.