केपे: कुड्डेगाळ-सावर्डे येथील फोमेंतो कंपनीने सावर्डे ट्रक संघटनेला विश्वासात न घेता सावर्डेबाहेरील ट्रकांना खनिज वाहतुकीत सामावून घेतल्याच्या निषेधार्थ सावर्डे पंचायत क्षेत्रातील ट्रकमालकांनी गुरुवारी (ता.२९) सकाळपासून खनिज वाहतूक रोखून धरली. या आंदोलनामुळे सावर्डे परिसरात तणावाचे वातावरण निर्माण झाले असून, बाहेरील ट्रकांची वाहतूक बंद केल्याशिवाय खनिज वाहतूक सुरू करू देणार नसल्याचा इशारा ट्रकमालकांनी दिला आहे.

गुरुवारी सकाळी खनिजाने भरलेले सुमारे ७० ट्रक स्थानिक ट्रकमालकांनी अडवून धरले. या ट्रकांना खाली करण्यास परवानगी न दिल्याने गुड्डेमळ ते सावर्डे तिस्कपर्यंत वाहनांच्या लांबच लांब रांगा लागल्या. परिणामी, परिसरातील वाहतुकीचा खोळंबा झाला. परिस्थिती नियंत्रणात ठेवण्यासाठी केपेचे पोलिस उपअधीक्षक नीलेश राणे आणि पोलिस निरीक्षक दितेंद्र नाईक हे पोलिस पथकासह सकाळपासून घटनास्थळी उपस्थित होते.

सकाळी सर्वप्रथम आलेले १५ ट्रक खाली करण्याची विनंती उपअधीक्षक राणे यांनी आंदोलकांना केली. मात्र, आंदोलकांनी ही विनंती फेटाळून लावत खनिजाने भरलेले सर्व ट्रक पुन्हा खाणीवर पाठविण्याची मागणी केली. दरम्यान, रात्री उशिरापर्यंत खनिजाने भरलेले ट्रक रस्त्यावरच उभे होते. बाहेरील ट्रकांच्या समावेशावरून निर्माण झालेला हा वाद कसा मिटणार आणि खनिज वाहतूक पुन्हा कधी सुरू होणार, याकडे आता सर्वांचे लक्ष लागले आहे.

स्थानिकांत नाराजीचे वातावरण

फोमेंतो कंपनीने सावर्डे पंचायत क्षेत्राबाहेरील ट्रकांना खनिज वाहतुकीत सामावून घेतल्याने स्थानिक ट्रकमालकांत नाराजी पसरली आहे. पूर्वसूचना न देता निर्णय घेतल्याने फसवणूक झाल्याचा आरोप संघटनेचे अध्यक्ष वल्लभ दळवी यांनी केला. कंपनीला यापूर्वी ६५० ट्रकांचे क्रमांक दिले होते. बाहेरील ट्रक वाढल्याने स्थानिकांना तीन दिवसांतून एकच खेप मिळण्याची शक्यता आहे. त्यामुळे आर्थिक नुकसान होईल. बाहेरील ट्रक वगळल्याशिवाय आंदोलन मागे घेणार नसल्याचे संघटनेने स्पष्ट केले.