Ferry Boat: पिळगाव - आमोणे मार्गावर पूल बांधण्यात येईल. त्यानंतर सारमानस माशेल जलमार्गावरील फेरीबोट सेवा बंद ठेवण्यात येईल, असे मुख्यमंत्री डॉ. प्रमोद सावंत यांनी आज विधानसभेत सांगितले. सारमानस येथील फेरीबोट धक्का रुंदीकरण जागेअभावी शक्य नाही, असेही त्यांनी नमूद केले.

मयेचे आमदार प्रेमेंद्र शेट यांनी लक्षवेधी सूचनेद्वारे हा विषय उपस्थित केला होता. ते म्हणाले, सारमानस - माशेल जलमार्गावर फेरीबोट धक्का अरुंद आहे. तेथे एक कार पाण्यात गेली होती. धक्का अरुंद आणि तीव्र उतार असल्याने तेथे प्रवास करणे जिकिरीचे असते.

मुख्यमंत्री म्हणाले, मी त्या जलमार्गावरून कधीतरी प्रवास करतो. तीव्र उतार व अरुंद धक्क्याची कल्पना आहे. ब्रेकवरील पाय जरा निसटला तर अपघात झालाच म्हणून समजा. याला मार्ग म्हणून पिळगाव - आमोणे पूल बांधता येईल, तो पूल झाला की फेरीबोट सेवा बंद करावी लागेल.

फेरीबोट सेवा सरकारला परवडत नाही. सारमानसच्या जनतेला आमोण्यात जाण्यासाठी पिळगावला येऊन जावे लागणार आहे. पूल झाल्यावर फेरीबोटही सुरू ठेवा ही मागणी मान्य करता येणार नाही.

पुलासाठी एका बाजूने २०० मीटर, तर दुसऱ्या बाजूने ६०० मीटर जागा जोड रस्त्यांसाठी संपादीत करावी लागणार आहे. जागेअभावी धक्का दुरुस्त करणे किंवा उतार कमी करणे शक्य नाही.