मडगाव : गोव्यातील प्रत्येक खासगी उद्योग व अन्य आस्थापनात गोमंतकीयांना 80 टक्के नोकऱ्या राखीव ठेवण्याची सक्ती करणारे एक खासगी विधेयक गोवा फॉरवर्डचे आमदार विजय सरदेसाई हे येणाऱ्या पावसाळी अधिवेशनात मांडणार असून या संबंधीची नोटीस त्यांनी आज विधिकार खात्याला दिली.

गोव्यातील प्रत्येक खासगी उद्योग, संस्था, सोसायट्या, प्रतिष्ठापने व अन्य आस्थापनात गोमंतकीयांना 80 टक्के नोकऱ्या देणे बंधनकारक करण्याची तजवीज या विधेयकात असून ही आस्थापने या तरतुदींचे पालन करतात की नाही हे पाहण्यासाठी खास अधिकारणी नेमण्याची तरतूद या विधेयकात आहे.

याबद्दल बोलताना विजय सरदेसाई म्हणाले, सध्या गोव्यात स्थानिक युवक मोठ्या प्रमाणावर बेकार असून या विधेयकाद्वारे त्यांना रोजगाराची शास्वती मिळू शकेल. हे विधेयक काळाची गरज असून अन्यथा गोवेकरांना नोकरी मिळविण्यासाठी बाहेरच्या राज्यात जाण्याची पाळी येईल.

या आस्थापनांना आवश्यक असलेले मनुष्यबळ राज्यात नसल्यास त्यांनी येथील युवकांना त्यासाठी प्रशिक्षण देऊन तयार करावे अशी तजवीज असून यासाठी जर कोणताही प्रयत्न न करता त्या आस्थापनांनी राज्या बाहेरून मनुष्यबळ आणले तर त्यांच्यावर कारवाई करण्याची तरतुद या विधेयकात असल्याचे त्यांनी सांगितले.