Disabled Student Accident: काही दिवसांपूर्वी पर्वरी येथे असलेल्या संजय विशेष मुलांच्या शाळेत दुसऱ्या मजल्यावरून पडून एक दिव्यांग जखमी झाल्याची घटना घडली होती. यानंतर ती इमारत जुनी असून सरकारचे लक्षच नसल्याचे नमूद करण्यात आले. आता जखमीला सरकारने नुकसानभरपाई द्यावी, अशी मागणी DRAG तर्फे करण्यात आली आहे.

पर्वरी येथील जुन्या एससीईआरटी इमारतीच्या दुसऱ्या मजल्यावरून पडून मणक्याला गंभीर दुखापत झालेल्या संजय स्कूलच्या विद्यार्थ्याला सरकारने 50 लाख रुपये नुकसानभरपाई द्यावी, अशी मागणी गोवा दिव्यांग अधिकार संघटना (DRAG)चे अध्यक्ष अॅव्हेलिनो डी सा यांनी केली आहे.

संबंधित विद्यार्थी व्यावसायिक विद्यार्थी शिक्षण विभागाच्या इमारतीच्या दुसऱ्या मजल्यावर असलेल्या आधार सुविधा केंद्रात गेला होता. तेव्हा त्याचा हा अपघात झाला. पर्वरी येथील जुन्या ‘एससीईआरटी’ची इमारत धोकादायक असल्याने तेथील व्यावसायिक केंद्र तसेच उच्च माध्यमिक शिक्षण संजय केंद्र स्थलांतर करण्याची शिफारस आठ महिन्यांपूर्वीच केली होती. मात्र याबाबत पुढे काहीच झाले नाही. परिणामी, यामध्ये एकाचा अपघात घडला.

DRAG ने दिलेल्या माहितीनुसार, सरकारने पणजीत 21 इमारती सुलभ करण्यासाठी 8 कोटी रुपये खर्च केल्याचा दावा केला आहे. पण कोणत्याही इमारतीत एकही प्रवेशयोग्य शौचालय किंवा कार पार्किंग नाही. त्यामुळे सरकारच्या चुकीमुळेच हे घडले असून, सरकारतर्फे पिडीताला 50 लाख रुपये नुकसानभरपाई मिळाली पाहिजे, असा दावा करण्यात आला आहे.