सांगे: येथील अनेक भागात पूरस्थिती निर्माण झाली असून नदी नाले तुडुंब भरून वाहत आहेत. विलियण भाटी येथील महादेव नाईक यांच्या घराची भिंत कोसळल्याने घरातील साहित्याची नासधूस झाली.

मामलेदार सिद्धार्थ परब यांनी या घराची पाहणी केली. हे घर मातीचे असून भिंत कोसळण्याचा आवाज ऐकून घराबाहेर पडल्याने आपण व आपली पत्नी वाचली, असे नाईक यांनी सांगितले. मात्र घरातील साहित्याची हानी झाल्याने किमान दोन लाख रुपयाची नुकसान झाल्याचे ते म्हणाले.

जिल्हाधिकाऱ्यांना अहवाल सादर करून पुढील सोपस्कार केले जातील, असे मामलेदार सिद्धार्थ परब यांनी यावेळी सांगितले. दरम्यान गेले पंधरा दिवसात दांडो येथील रस्ता पाण्याखाली गेल्याने कोटार्ली, शेळपे, मळकोर्णे भागात जाणाऱ्या नागरिकांना गाव गाठण्यासाठी मोठी कसरत करावी लागते.