Khandepar Bridge Accident

पाळी: खांडेपारच्या नवीन पुलावर ट्रकमधून रेतीचा ढिगारा कोसळल्यामुळे दोन दुचाकीस्वारांना अपघात झाला. केवळ सुदैव म्हणून हे दुचाकीस्वार बालंबाल बचावले. रात्रीच्या वेळी हा रेतीचा ढिगारा एखाद्या ट्रकमधून वाहतूक करताना कोसळला असावा, असा कयास व्यक्त करण्यात येत असून या ढिगाऱ्याचा अंदाज न आल्याने अनेक दुचाकीस्वार पडता पडता वाचले. तरीही दोन दुचाकीस्वार रस्त्यावर आडवे झाले, पण किरकोळ जखमांवर ते बचावले.

दरम्यान, रात्रीच्यावेळेला रेतीची चोरटी वाहतूक सुरू असून हे रेती नेमकी येते कुठून असा सवाल केला जात आहे. खांडेपारच्या नवीन पुलावर दोन दिवसांपूर्वी अचानक रेतीचा ढिगारा दिसल्यामुळे वाहनचालक गोंधळले. पहाटेच्या दरम्यान ही घटना घडली. चौपदरी पूल असल्याने वाहने वेगात असतात,अचानक समोर रेतीचा ढिगारा दिसल्याने दुचाकीस्वार गोंधळले या ढिगाऱ्यामुळे गंभीर अपघाताचा धोका निर्माण झाला होता, पण दुचाकीस्वार थोडक्यात बचावले.

रेतीची वाहतूक कुठून केली जाते?

सध्या रेती उत्खननाला बंदी आहे, तरीपण रात्रीच्या वेळेला रेतीची वाहतूक बिनधास्तपणे सुरू असल्याचे निदर्शनास आले आहे. रात्रीच्यावेळेला सुरक्षा यंत्रणेला व्यवस्थित हाताळून ही रेती वाहतूक होत आहे. त्यामुळे ‘तेरी भी चूप और मेरी भी चूप’ असा प्रकार सध्या सुरू आहे, तरीपण नवीन खांडेपार पुलावरून वाहतूक होणारी रेती कुठून येते, असा सवाल केला जात आहे.