पर्वरी: परिसरातील वाढता कचरा, मैदानाची झालेली दुरवस्था आणि वाढती अनधिकृत बांधकामे या विषयावरुन साल्वादोर द मुन्‍दचे ग्रामस्थ बरेच आक्रमक झाले. पंचायतीकडून सध्या गैरव्यवस्थापन होत असून ग्रामस्थांच्या समस्येकडे दुर्लक्ष केले जात असल्याचा आरोप त्‍यांनी ग्रामसभेत केला.

पंचसदस्य रिना फर्नांडिस यांनी सांगितले की, येथील फुटबॉल मैदान हे मंत्री रोहन खंवटे यांच्या नेतृत्वाखाली बांधण्यात आले आहे. या मैदानाची निगा राखण्यात येत असून तेथे आंतराष्ट्रीय पातळीवरील पर्यटक भेट देतात. या मैदानाच्या वापरासाठी स्थानिकांकडून शुल्क आकारण्यात येत आहे. त्यामुळे मैदानांच्या देखभालीबाबत चुकीची माहिती देऊ नये.

पंचसदस्य दत्ताराम रेडकर यांनी गावात कचरा साचत असल्याचे निदर्शनास आणून दिले. गेल्या पंधरा दिवसांत त्यांनी स्वतः तीन ट्रक कचरा उचलला आहे. पंचायतीकडून कचरा कर वसूल केला जात असला तरी योग्य दैनंदिन कचरा संकलन अद्याप होत नाही आणि ते सुनिश्चित करणे आवश्यक आहे यावर त्‍यांनी भर दिला.

विरोधी पंचसदस्यांनी तसेच रहिवाशांनी पंचायतीने तातडीने कचरा संकलनावर कारवाई करावी आणि साचलेल्या कचऱ्याच्या दुर्गंधीपासून मुक्त करावे अशी मागणी केली. चुकीची माहिती पसरवणाऱ्यांना अधिकाऱ्यांनी ओळखावे आणि त्यांच्‍यावर कारवाई करावी, अशी मागणी त्‍यांनी केली.