केपे : करमणे सावर्डे येथील रूपा सुधाकर पारकर या महिलेच्या खून प्रकरणी कुडचडे पोलिसांनी मूळ दांडेली (कर्नाटका), सध्या काकोडा कुडचडे येथे राहणारा हुसेन कासीम खान (40) या युवकाला अटक केली आहे.

सदर खून चोरीच्या उद्देशाने केला होता हे स्पष्ट झाले असून रुपा हिच्या अंगावर असलेले सोन्याचे दागिने हुसेन याने कुडचडे येथील मुथुट फायनान्स मध्ये गहाण ठेवून आपले काही कर्ज फेडले तर बाकीच्या पैशातून एक दुचाकी सुद्धा विकत घेतल्याचे पोलीस तपासात उघड झाल्याची माहिती दक्षिण गोवा पोलीस अधीक्षक अभिषेक धनिया यांनी आज पत्रकार परिषदेत दिली. (Rupa Parkar murder case Accused Hussein pays off debts stolen from jewelry from her)

5 मे रोजी रूपा हिचा खून करून गांधीनगर सावर्डे येथील मुख्य रस्त्याच्या शेजारी आड रस्त्यावर फेकून देण्यात आला होता. तो मृतदेह दुसऱ्या दिवशी 6 रोजी संध्याकाळी 7 च्या सुमारास दृष्टीस पडल्याने कुडचडे पोलिसांनी घटनास्थळी जाऊन पंचनामा करून सदर मृतदेह पुढील तपासणीसाठी मडगाव येथील जिल्हा हॉस्पिटलमध्ये पाठवून दिला.

रूपा हिचा मृत्यू डोक्यावर गंभीर वार झाल्याने झाल्याचे तपासणी अहवालात स्पष्ट झाल्याने कुडचडे पोलिसांनी त्यादृष्टीने तपस करण्यास सुरुवात केली होती. खुनाविषयी कोणतेच धागेदोरे सापडत नसल्याने पोलिसांसमोर या खुनाचा तपास लावणे बरेच कठीण बनले होते.