Goa News: सांगे भागात एका बंद खाणीत फलोत्पादन महामंडळाद्वारे काकडी फेकली गेली, असे जे सांगण्यात येते ती निव्वळ अफवा असून फलोत्पादन महामंडळाद्वारे अशा प्रकारे कोणत्याच भाजीची नासाडी केली जात नाही.

आमच्याकडे अधिक प्रमाणात भाजीचे उत्पादन असल्यास आम्ही ते बेळगावला पाठवतो, असे फलोत्पादन महामंडळाचे व्यवस्थापक चंद्रहास देसाई यांनी ‘गोमन्तक’ला सांगितले. दरम्यान देसाई म्हणाले, चतुर्थी दरम्यान व्यापाऱ्यांनी विक्रीसाठी घेतलेली ही काकडी असू शकते. काकडी अधिक काळ राहिल्यास तिची चव बदलते तिच्यात कापूस धरतो. आमच्याकडे अधिक प्रमाणात जर काकडी आल्यास आम्ही ती बेळगावला विक्रीसाठी पाठवतो.

मागील महिन्याभरात अंदाजे ३० ते ४० टन काकडी आम्ही बेळगावला पाठविली आहे, त्यामुळे हा प्रकार महामंडळाकडून झालेला नाही, असेही त्यांनी सांगितले. भाजी हे ओले आणि नाशवंत उत्पादन असल्याने काही प्रमाणात खराब होऊ शकते. मात्र, एवढ्या मोठ्या प्रमाणात ते खराब होऊ शकत नाही, त्यामुळे ती काकडी फलोत्पादन महामंडळाची नाही, एवढे आपण सांगू शकतो, असेही त्यांनी सांगितले.

भाजी उत्पादकांना निश्‍चित हमीभाव!

गोवा फलोत्पादन महामंडळाद्वारे भाजीचे उत्पादन घेणाऱ्या शेतकऱ्यांना निश्‍चित हमीभाव दिला जातो. जेणेकरून शेतकऱ्यांना त्यांच्या उत्पन्नाला निश्‍चित दर मिळण्याची खात्री होते. तसेच भाजी विकताना बाजारातील त्या उत्पादनाच्या सर्वात निचांकी दरात ती विकली जाते. मागील महिन्याभरात काकडीसह इतर भाज्या धरून एकूण 1688 टन म्हणजेच 4 कोटींची भाजी बेळगावला निर्यात करण्यात आली आहे,असे चंद्रहास देसाई यांनी सांगितले.