Road Safety Week : साखळी ता. ११ (प्रतिनिधी) : येथील पालिकेतर्फे रस्ता सुरक्षा सप्ताहानिमित्त जागृती मोहीम राबवण्यात आली. येथील बसस्थानकावर सरकारी उच्च माध्यमिक विद्यालयाच्या विद्यार्थ्यांनी पथनाट्य सादर करून वाहतूक नियमांची माहिती दिली.

हेल्मेट, सीटबेल्ट, मद्यपान करून गाडी चालविणे, सिग्नल तोडणे, तिघेजण बसून दुचाकी हाकणे अशा विषयांवर विद्यार्थ्यांनी प्रकाश टाकला.

यावेळी नगराध्यक्षा रश्मी देसाई, उपनगराध्यक्ष आनंद काणेकर, नगरसेविका दीपा जल्मी, वाहतूक पोलिस सहाय्यक उपनिरीक्षक गोपाळ केरकर, सरकारी उच्च माध्यमिक विद्यालयाचे शिक्षक समीर प्रभू, नितीश नाईक, समिता कुलकर्णी, श्रध्दाली बेटकर व इतरांची उपस्थिती होती.

पथनाट्यानंतर छत्रपती शिवाजी महाराज चौकात विना हेल्मेट दुचाकीचालकांना अडवून नगराध्यक्षा रश्मी देसाई व इतरांनी हेल्मेट परिधान करण्याचे महत्त्व सांगून जागृती पत्रके वितरित केली. यावेळी विद्यार्थी व शिक्षकही उपस्थित होते.

वाहतूक नियम पाळा : देसाई

रस्त्यावर वाहने चालवत असताना आपल्या एका चुकीमुळे गंभीर अपघात घडू शकतो. त्यात एखाद्या निष्पाप व्यक्तीचा जीवही जाऊ शकतो. त्यासाठी वाहने चालवताना सदैव संयम ठेवावा.

आपल्या व इतरांच्याही सुरक्षिततेसाठी वाहतूक नियम पाळत सुरक्षित वाहने चालवावीत, असे आवाहन नगराध्यक्षा रश्मी देसाई यांनी यावेळी केले.