फोंडा : गोव्यात गेल्या काही दिवसांमध्ये रस्ते अपघातांमध्ये लक्षणीय वाढ झाली आहे. त्यातच खांडेपार येथील जुन्या पुलावर शुक्रवारी रात्री अपघात झाला ज्यात चालक गंभीर जखमी झाला आहे. अपघातात आणखी एका व्यक्तीला किरकोळ इजा झाली आहे. दोघांवरही उपचार सुरु आहेत. (Accident in Khandepar Ponda News Updates)

फोंडा परिसरातील खांडेपार येथे शुक्रवारी रात्री 1.30 वाजण्याच्या सुमारास भीषण अपघात झाला आहे. या अपघातात (Accident) मालवाहू ट्रक आणि रिक्षा यांच्यात जोरदार धडक झाली. मध्यरात्री झालेल्या अपघातात कोल्हापूरहून आलेला रिक्षाचालक किरण रेडकर गंभीर जखमी झाला आहे, तर विजय हेगडे नावाचा व्यक्ती किरकोळ जखमी झाल्याची माहिती आहे. अपघात एवढा भीषण होता की रिक्षाच्या दर्शनी भागाचा चक्काचूर झाला आहे.

दरम्यान मागच्याच आठवड्यात ओल्ड गोवा (Old Goa) परिसरात एका तरुणाचा माड कोसळून अपघात झाला होता. या अपघातात त्याचा दुर्दैवी मृत्यू झाला. यानंतर बांबोळी परिसरात गोमेकॉसमोर (GMC) एक भरधाव प्रवासी बस उलटून अपघात झाला होता, ज्यात बसमधील प्रवासी जखमी झाले होते आणि चालक गंभीर जखमी झाला होता. फर्मागुडीमध्येही दुचाकीचालक कंटेनरखाली आल्याने अपघात झाला होता. यात चालकाचा जागीच मृत्यू झाला होता, तर त्याच्या पत्नीवर उपचार सुरु होते.