Babush Monserrat: महसूलमंत्री बाबूश मोन्सेरात यांना उद्या बुधवारी गोमेकॉ इस्पितळातून डिस्चार्ज मिळण्याची शक्यता आहे. रविवारी रात्री हृदयविकाराचा झटका आल्याने त्यांना गोमेकॉत दाखल करण्यात आले होते. त्यांच्यावर त्याच दिवशी मध्यरात्री कार्डिओलॉजिस्ट डॉ. अमर प्रभुदेसाई यांनी अँजिओप्लास्टी शस्रक्रिया केली.

आजारातही बाबूश यांना 'स्मार्ट सिटी' कामांची काळजी

अँजिओप्लास्टि झाल्यानंतर डॉक्टरांच्या देखरेखाली गोमेकॉत विश्रांती घेत असलेले मंत्री बाबूश यांना 'स्मार्ट सिटी' च्या कामांची काळजी दिसून आली. सूत्रांनी दिलेल्या माहितीनुसार मंगळवारी सायंकाळी महानगरपालिका अधिकारी मंत्री बाबूश यांना विचारपूस करण्यासाठी गेले होते. परंतु यावेळी बाबूश यांनी त्यांच्याकडे स्मार्ट सिटीच्या कामांची विचारणा केली.

दोन दिवस त्यांना डॉक्टरांच्या देखरेखीखाली ठेवले होते. डॉ. प्रभुदेसाई यांनी केलेली शस्रक्रिया यशस्वी झाल्याने त्यांच्यावर पुढील उपचारांची गरज वाटत नाही. दरम्यान, गोमेकॉतील वैद्यकीय सूत्रांकडून मिळालेल्या माहितीनुसार मंत्री मोन्सेरात यांची प्रकृती स्थिर असून उद्या बुधवारी त्यांना डिस्चार्ज मिळू शकतो.

महसूलमंत्री तथा पणजीचे आमदार आतानासियो (बाबूश) मोन्सेरात यांच्यावर रविवारी मध्यरात्री अँजिओप्लास्टी शस्त्रक्रिया करण्यात आली. रविवारी रात्री सव्वाअकराच्या सुमारास अस्वस्थ वाटू लागल्याने त्यांना तत्काळ गोमेकॉमध्ये दाखल करण्यात आले होते. शस्रक्रिया झाल्यानंतर सुपर स्पेशालिटी हॉस्पिटलमध्ये त्यांना हलविण्यात आले आहे.

मंत्री बाबूश यांच्यावर शस्रक्रिया झाल्याचे वृत्त सकाळी ‘गोमन्तक टीव्ही’वर सर्वात प्रथम देण्यात आले. आमदार मोन्सेरात यांच्यावर शस्रक्रिया झाल्याचे वृत्त समजताच त्यांचे कार्यकर्ते, नगरसेवकांनी गोमेकॉकडे धाव घेतली.