काणकोण : काणकोण पालिकेचे चावडी येथे मध्यवर्ती ठिकाणी असलेले उद्यान दोन वर्षानी खुले करण्यासाठी पालिकेने प्रयत्न सुरू केले आहेत. कोरोना महामारीमुळे दोन वर्षे उद्यान बंदच होते. मध्यंतरी या उद्यानातील मोठ्या झाडांची छाटणी करण्यात आली. उद्यानात सध्या गवत वाढले असून उद्यानातील झोपाळे, घसरगुंडी आणि खेळण्याचे अन्य साहित्य गंजून गेले आहे. पोर्तुगीजकालीन हे उद्यान पालिकेचे भूषण आहे. (Chavadi Udyan in Canacona News Updates)

गोवा मुक्तीनंतर काणकोणमधील (Canacona) या उद्यानात ध्वनीक्षेपकाची व्यवस्था होती. सकाळ-संध्याकाळी या उद्यानातून आकाशवाणी वरील बातम्या आणि संगीताचे प्रसारण करण्यात येत होते. मात्र, काळाच्या ओघात ते बंद झाले पालिकेने दरवर्षी या उद्यानाच्या विकासासाठी लाखो रुपये खर्च केले. राजबाग येथे असलेल्या द ललित पंचतारांकित हॉटेलने काही वर्षांपूर्वी या उद्यानात रोषणाई केली. मात्र, पाच वर्षापासून हॉटेल (Hotel) व्यवस्थापनाने देखभालीसबंधीची आपली भूमिका बदलली आहे.

सीएसआर उपक्रमांतर्गत पाळोळे येथील सरोवर आस्थापनाकडून उद्यानाचा विकासाचा प्रस्ताव आहे. आज बुधवारी या हॉटेलचे अधिकारी उद्यानाच्या पाहणीसाठी येणार आहेत. त्यासाठी उद्यानाची स्वच्छता करण्यात आली. हॉटेल व्यवस्थापनाने सीएसआरअंतर्गत उद्यान दत्तक घेतल्यास पालिकेला आनंद आहे. अन्यथा सुडातून उद्यानाचा विकास (Development) करण्याचा पर्याय पालिकेकडे असल्याचे नगरसेवक रमाकांत नाईक गावकर यांनी सांगितले.