Goa News: मांगोर-वास्को येथील रहिवाशांसाठी नौदल परिसरातून रस्ता उपलब्ध करून देण्याच्या 42 वर्षे जुन्‍या समस्येचे आमदार कृष्णा साळकर यांच्या शिष्टाईने अखेर निराकरण करण्यात आले. त्‍यांनी नौदल आणि राज्य प्रशासनासोबत संयुक्त बैठक बोलावून क्षेत्राची संयुक्त पाहणी केल्यानंतर सामंजस्य कराराद्वारे हा प्रश्न सोडविला.

दक्षिण गोव्याचे जिल्हाधिकारी आश्विन चंद्रू, मुरगावचे उपजिल्हाधिकारी भगवंत करमली, नौदल अधिकारी आणि रहिवाशांसह त्‍यांनी पाहणी केली.

पत्रकारांशी बोलताना साळकर म्हणाले, मांगोर येथील अनेक घरांच्या सुधारणेसाठी राज्य सरकारकडून नौदल परिसरातून एक रस्ता लवकरच बांधला जाईल. जवळ बरीच घरं आहेत. अयप्पा मंदिर आणि एक निवासी इमारत आहे, जिथे बरेच लोक राहतात. परंतु त्यांना नेव्हल क्षेत्रातून महामार्गावर प्रवेश करण्याची समस्या भेडसावत होती.

तसेच गेल्या अनेक वर्षांपासून हा प्रश्न सुरू होता आणि दोन्ही पक्षांची बाजू न्यायालयात गेल्याने त्यावर कोणताही तोडगा निघाला नाही. त्यांची बाजू आणि खटला बराच काळ रेंगाळत होता, असे साळकर म्हणाले.

आम्ही एक उपाय शोधून काढला आहे जिथे आम्ही सरकारसोबत सामंजस्य करार करू, ज्यामध्ये स्थानिकांना रस्त्याच्या रूपात प्रवेश मिळेल आणि नौदल आम्हाला रस्त्यासाठी आवश्यक असलेली जमीन देईल. आम्ही नौदलाला सहानुभूतीपूर्ण दृष्टिकोन ठेवण्याची विनंती करण्यात यशस्वी झालो आहोत. तेथे रस्ता अतिशय अरुंद आहे. या दोन्ही प्रमुख समस्यांचे निराकरण झाल्याने नौदल आणि नागरिक यांच्यात मित्रत्वाचे संबंध निर्माण होतील, असे साळकर म्‍हणाले.