चांगल्या पायाभूत सुविधा उपलब्ध करून देण्याच्या तसेच प्राथमिक शाळेतील विद्यार्थ्यांचे शिक्षण सुधारण्याच्या उद्देशाने ग्लेनमार्क फाऊंडेशनने सीएसआर निधीअंतर्गत कोणीवाडा-कोलवाळ येथील सरकारी प्राथमिक शाळेचे नूतनीकरण केले. आता मुलांना शाळेमध्ये बसण्यासाठी उत्तम बाक, वॉशरुम, खेळण्याची जागा तसेच विद्यार्थ्यांच्या देखरेखीसाठी सीसीटीव्ही कॅमेरे बसविण्‍यात आले आहेत.

यावेळी ग्लेनमार्क फाऊंडेशनचे वरिष्ठ उपाध्यक्ष परीन दशोत्तर म्हणाले की, माणसाच्या जीवनात शिक्षण हे अतिशय महत्त्‍वाचे आहे आणि ते शाळेतच मिळते. याच भावनेतून या शाळेमध्ये उत्कृष्ट पायाभूत सुविधा उपलब्ध करून दिल्या आहेत. आम्ही सीएसआरअंतर्गत विविध कामे हाती घेतली आहेत. हे आमचे सर्वोत्तम काम आहे. कोणीवाडा येथील नूतनीकरण केलेल्या सरकारी प्राथमिक विद्यालयाचे लोकार्पण केल्यानंतर ते बोलत होते.

यावेळी गावचे सरपंच दशरथ बिचोलकर, पंच रितेश वारखंडकर, फाऊंडेशनचे रोहित गुप्ता, बाळकृष्ण कामत, राज वैद्य, भिकाजी साळगावकर, वैष्णव सावळ, मुख्याध्यापिका नूतन सावंत व पालक उपस्थित होते.

नवीन बाक, खेळण्याची साधने, पटांगण, वॉटर फिल्टर आणि खूप काही...

या सरकारी शाळेच्या इमारतीमधील अंगणवाडीमध्येही आवश्‍‍यक सुविधा निर्माण करून देण्‍यात आल्‍या आहेत. ग्लेन मार्क फाऊंडेशनने दर्जा उंचावण्यासाठी आवश्यक असलेल्या विविध पायाभूत सुविधांमध्ये उन्नती साधली आहे. नवीन बाक, सीसीटीव्ही कॅमेरे, संरक्षक भिंतीचे नूतनीकरण, वर्ग खोल्यांची दुरुस्ती, रंगकाम, स्वच्छतागृह, खेळण्याची साधने, पटांगण, वॉटर फिल्टर अशा सुविधा आता विद्यार्थ्यांना मिळणार आहेत.