कळंगुट: पर्वरीतील ओ कोकेरो सर्कल ते सांगोल्डामार्गे साळगाव आणि कळंगुट येथील सेंट आलेक्स चर्च परिसर अशा चोगम रोड नावाने ओळखल्या जाणाऱ्या रस्त्याची सध्या चाळण झाली आहे. तसेच कळंगुट नाईकवाड्यातील पोलिस स्थानक ते सेंट आलेक्स चर्चपर्यंतचा रस्ता वाहनचालकांसाठी डोकेदुखी बनला आहे. विधानसभा निवडणूक होण्यापूर्वी राज्यातील सर्व रस्ते खड्डेमुक्त करण्याचे आश्वासन मुख्यमंत्री प्रमोद सावंत यांनी दिले होते. परंतु नवीन सरकार स्थापन झाले तरी कळंगुटमधील रस्ते डांबरीकरणाच्या प्रतीक्षेत असल्याने सामाजिक कार्यकर्ते सूरज नाईक कळंगुटकर यांनी तीव्र नापसंती व्यक्त केली.

सध्या राज्यात पर्यटन हंगाम सुरू असल्याने दिवसाकाठी हजारो पर्यटकांची रिघ कळंगुट परिसरात लागलेली असते. त्यामुळे सार्वजनिक बांधकाम खात्याने येथील रस्त्यांची त्वरित डागडुजी करून डांबरीकरण करण्याची मागणी वाहनचालक तसेच ग्रामस्थांनी केली आहे.