Goa Crime News: सध्‍या नवेवाडे-वास्‍काे येथील दुहेरी जळीतकांड प्रकरण गाजत असतानाच तीन महिन्‍यांपूर्वी नुवे येथे जळून मृत्‍यू आलेल्‍या सुमंता फर्नांडिस हिचे मृत्‍यू प्रकरणही पुन्‍हा चर्चेत आले आहे. आपल्‍या मुलीला तिच्‍या सासरच्‍याच लोकांनी जाळून मारले आहे,

असा आरोप तिची आई मारिया फर्नाडिस यांनी केला आहे. या प्रकरणात संबंधितांवर 48 तासांच्‍या आत हुंड्यासाठी छळ आणि खुनाच्‍या आरोपाखाली गुन्‍हा नोंद करा, अशी मागणी करणारे एक निवेदन दक्षिण गोवा पोलिस अधीक्षकांना दिले आहे.

दरम्‍यान, मंगळवारी (ता.२८) सुमंताच्‍या आईसह प्रतिमा कुतिन्‍हो यांनी मायणा-कुडतरी पाेलिस स्‍थानकाला भेट देऊन निरीक्षक अरुण देसाई यांची भेट घेतली. याप्रकरणी सुमंताचा नवरा नोएल ब्रागांझा आणि त्‍याच्‍या आईवर गुन्‍हा नोंद करा, अशी मागणी त्‍यांनी केली.

जोपर्यंत गुन्‍हा नोंद केला जात नाही तोपर्यंत मृतदेह ताब्‍यात घेणार नाही, अशी भूमिका तिच्‍या आईने घेतल्‍याने मागचे तीन महिने सुमंता हिचा मृतदेह गोमेकॉच्‍या शवागृहात पडून आहे.

त्यांनीच सुमंताला जाळून मारले

सुमंता हिचे सात वर्षांपूर्वी नोएल याच्‍याशी लग्‍न झाले होते. तीन महिन्‍यांपूर्वी तिने स्‍वत:ला जाळून घेतल्‍याने मृत्‍यू झाल्‍याचा तिच्‍या घरच्‍या लोकांनी दावा केला हाेता. तिला चार वर्षांची एक मुलगीही आहे. सुमंता हिने केलेली आत्‍महत्‍या नसून तिला मुद्दामहून जाळून मारण्‍यात आले, असा आरोप सुमंताच्‍या आईने केला आहे.