मडगाव: गोव्यातील (Goa) स्थानिक काँग्रेस (Congress) नेतृत्वाला कंटाळून कुडतरीचे आमदार आलेक्स रेजिनाल्ड लॉरेन्स (Alex Reginald Lawrence) हे काँग्रेसला रामराम करून आम आदमी पक्षात (Aam Aadmi Party) प्रवेश करणार अशी जी चर्चा चालू होती त्याला आमदार लॉरेन्स यांनी आज त्यांच्या वाढदिवशी विराम दिला. आपण काँग्रेस सोडून जाणार नाही तर काँग्रेसमध्ये राहूनच भाजपला (BJP) विरोध करणार हे त्यांनी स्पष्ट केले.

काँग्रेस प्रदेशाध्यक्ष गिरीश चोडणकर आणि विरोधी पक्षनेते दिगंबर कामत यांच्या बरोबर घेतलेल्या पत्रकार परिषदेत रेजिनाल्ड यांनी ही घोषणा केली. गोव्याला भाजपपासून वाचवायचे हे एकमेव ध्येय ठेवून आपली पुढील वाटचाल असेल असे त्यांनी सांगितले.

प्रदेशाध्यक्ष चोडणकर यांनी लॉरेन्स हे पक्षाचे महत्त्वाचे नेते असून ते पक्षाचा चेहरा आहेत. त्यांच्या ज्या मागण्या आहेत त्या पूर्ण करण्याचे आश्वासन पक्षश्रेष्ठींनी दिले असून भविष्यात त्यांना त्यांना पक्षात मानाचे पद दिले जाईल असे सांगितले.

विरोधी पक्षनेते कामत यांनी रेजिनाल्ड पक्ष सोडून जाणार नाहीत याची आपल्याला मनोमन खात्री होती. त्यांच्या या निर्णयाने पक्षाचे मनोबल अधिक मजबूत झाले आहे असे ते म्हणाले.