डिचोली : पावसाळा अवघ्याच दिवसांवर येऊन ठेपल्याने डिचोलीत लाल मिरचीची आवक वाढली आहे. बुधवारी आठवडी बाजारात स्थानिक गावठी मिरचीसह राज्याबाहेरील मिरची मोठ्या प्रमाणात विक्रीस उपलब्ध होती. मात्र, राज्याबाहेरील मिरचीच्या तुलनेत स्थानिक गावठी मिरचीचे दर वधारल्याचे दिसून आले. गावठी मिरचीचे दर ऐकताच ग्राहकांच्या कपाळावर आठ्या पडत होत्या.

विविध रोगांचा प्रादुर्भाव त्यातच ‘अवकाळी’मुळे यंदा मिरची पिकाच्या उत्पादनावर परिणाम झाला. त्यामुळे यंदा स्थानिक मिरची महाग झाली आहे, असे काही विक्रेत्यांनी सांगितले. राज्याच्या विविध भागांतून येणारी मिरची यंदा महागली आहे. सध्या स्वच्छ न केलेली (देठ न काढलेली) मिरची 800 ते एक हजार रुपये प्रतिकिलो या दराने विकण्यात येत आहे.

गेल्या वर्षी मिरचीचे दर 600 रुपये प्रतिकिलो होते. सध्या बांदा आणि जांबोटी भागातील मिरचीचे दर 250 ते 300 रुपये प्रतिकिलो असे आहेत. डिचोलीसह पेडणे, बार्देश, सत्तरी आदी राज्यांतील काही भागांत पिकणारी गावठी मिरची बाजारात येत असली, तरी तिचे प्रमाण कमी आहे. राज्यातून उपलब्ध होणाऱ्या मिरचीपेक्षा कर्नाटकातील जांबोटी आणि महाराष्ट्रातील बांदा आदी भागातून उपलब्ध होणाऱ्या मिरचीचे प्रमाण अधिक आहे.