सासष्टी: कुंकळ्ळी पोलिस ठाण्याच्या हद्दीत शिकवणीसाठी येणाऱ्या अल्पवयीन मुलीवर 2010 पासून बलात्कार करत असल्याचा आरोप असलेला मायकल क्रास्टो या ट्युशन टीचरने न्यायालयात अटकपूर्व जामीनासाठी केलेला अर्ज होता. पण, हा अर्ज न्यायालयाने फेटाळून लावल्याने त्याने गुरुवारी कुंकळ्ळी पोलिस ठाण्यात येऊन शरणागती पत्करली.

कुंकळ्ळी पोलिसांनी दाखल केलेल्या तक्रारीनुसार, संशयित सदर पीडितेवर अल्पवयीन अवस्थेत असल्यापासून ते आतापर्यंत अत्याचार करून तिचा छळ करत होता. 2010 साली संशयित पीडित युवतीची शिकवणी घेण्यासाठी येत होता. यावेळी संशयिताने अनेक वेळा तिच्यावर बलात्कार केला आणि याबाबत कुणाला सांगितल्यास तिचे नाव बदनाम तसेच तिच्या वडिलांना जीवे मारण्याची धमकी दिली. सलग अत्याचार करून तिच्यावर दोन वेळा मातृत्व लादले, तर दोन्ही वेळा तिचा गर्भपात करण्यात आला, असे तक्रारीत म्हटले आहे.

संशयिताच्या अत्याचाराला कंटाळून युवतीने अनेकवेळा आत्महत्या करण्याचाही प्रयत्न केला. संशयिताच्या सतत पाठलाग करण्याच्या वृत्तीमुळे मुलीने शिक्षणही सोडले, असे तक्रारीत नमूद करण्यात आले आहे. कुंकळ्ळी पोलिसांनी संशयित मायकल क्रास्टो (अंदाजे वय 50) यांच्याविरोधात बलात्कार, गोवा बाल कायदा, पोक्सॉ कायदा व एट्रोसीटी कायद्याखाली गुन्हा नोंद केला असून, या प्रकरणी पोलिस पुढील तपास करीत आहेत.