आगोंद: काणकोण तालुक्याला भेडसावणाऱ्या विविध समस्‍यांबाबत आज सभापती तथा स्थानिक आमदार रमेश तवडकर यांनी श्रीस्थळ येथील शासकीय विश्रामधाम येथे विविध सरकारी खात्यांच्या ज्येष्ठ अधिकाऱ्यांशी चर्चा केली. तसेच मान्‍सनपूर्व कामे वेळेत मार्गी लावण्‍याचा आदेश दिला.

सरकारी पातळीवर सुरू असलेल्या व काही बंद असलेल्या कामासंदर्भात विचारविनिमय करण्यात आला. यामध्ये सार्वजनिक बांधकाम खाते, जलस्रोत खाते, वीज खाते आणि पाणी वितरण विभागाचा समावेश होता. यावेळी नगराध्यक्ष सायमन रिबेलो, भाजप मंडल अध्यक्ष विशाल देसाई, नगरसेवक रमाकांत नाईक गावकर, हेमंत नाईक गावकर, माजी नगरसेवक किशोर शेट, सम्राट भगत, किरण नाईक गावकर यांची उपस्‍थिती होती. त्‍यांनी विविध खात्यासंबंधी माहिती मिळवण्याचा प्रयत्न करून मान्सूनपूर्व कामे पूर्ण करण्याची मागणी केली. सभापती तवडकर यांनी प्राधान्यक्रमाने मान्सूनपूर्व कामे महिनाभरात पूर्ण करण्याचा आदेश संबंधित अधिकाऱ्यांना दिला.