Goa Forest Fire: गोव्यात अलीकडच्या काळात जंगलात आग लागण्याच्या अनेक घटना समोर आल्या होत्या. या आगीमध्ये एकूण जवळपास 4.18 चौरस किलोमीटर वनक्षेत्र खाक झाले आहे.

केंद्रीय पर्यावरण आणि वन राज्यमंत्री अश्विनीकुमार चौबे यांनी गुरुवारी राज्यसभेत खासदार लुइझिन फालेरो यांनी विचारलेल्या प्रश्नाला लेखी उत्तरातून ही माहिती दिली.

गेल्या महिन्यात राज्यभरात जंगलामध्ये आगीच्या 74 घटना घडल्या होत्या. गेल्या महिन्यात राज्यभरातील खाजगी जमीन, राखीव जंगले, कोमुनिदाद जमीन आणि संरक्षित भागात या आगीच्या घटना घडल्या होत्या.

यात तीन वन्यजीव अभयारण्यांमधील 2.27 चौरस किलोमीटर क्षेत्र बाधित झाले होते. त्यासह एकूण सुमारे 4.18 चौरस किलोमीटर वनक्षेत्र आगीत खाक झाले होते.

मंत्री चौबे यांनी म्हटले आहे की, मार्चच्या पहिल्या पंधरवड्यात नोंदवलेल्या 74 आगीच्या घटनांपैकी 32 आगीच्या घटना तीन वन्यजीव अभयारण्यांमध्ये नोंदल्या गेल्या. बहुतेक जंगलातील आग त्याच दिवशी आटोक्यात आली असली तरी, आगीच्या घटना दुर्गम आणि दूरच्या डोंगराळ भागात नोंदवली गेली होती.

भारतीय वायुसेनेच्या (IAF) सहाय्याने ग्राउंड टीमद्वारे या आगींवर नियंत्रण आणण्यात आले. त्यासाठी हेलिकॉप्टरमधून पाण्याचा फवाराही केला गेला.

जरी मंत्रालयाने जंगलातील आग रोखण्यासाठी राज्ये/केंद्रशासित प्रदेशांच्या प्रयत्नांना मदत केली असली तरी आगीपासून संरक्षण आणि व्यवस्थापन ही मुख्यत्वे राज्य/केंद्रशासित प्रदेशांची जबाबदारी आहे. राज्यात एकाही वनक्षेत्रावर अतिक्रमण झालेले नाही.

जंगलातील आगीशी लढण्यासाठी एनडीआरएफच्या दोन बटालियन्सना प्रशिक्षण देण्यात आले आहे, असे चौबे यांनी सांगितले.