कळंगुट: नागवा-हडफडे पंचायत क्षेत्रातील रावतावाडा प्रभागात अज्ञाताकडून अशोक बिश्नोई (३५, राजस्थान) या राजस्थानी तरुणास जबर मारहाण करण्यात आली असून याबाबतीत हणजूण पोलिसांत रितसर तक्रार दाखल करण्यात आली आहे.

हणजूण पोलिस स्थानकाचे निरीक्षक सूरज गावस पोलिस पुढील तपास करीत आहेत. याबाबत मिळालेल्या माहितीनुसार, मारहाण करण्यात आलेला अशोक बिश्नोई हा राजस्थानी तरुण गॅस सिलिंडर टेक्निशियन म्हणून काम पाहत होता.

मंगळवारी रात्री उशिरा बिश्नोई राहत असलेल्या नागवा-हडफडे येथील त्याच्या भाडोत्री रुमवर एकूण सात तरुणांनी पूर्ववैमनस्यातून हल्ला केल्याची तक्रार हणजूण पोलिसांत दाखल करण्यात आली आहे.

या हल्ल्यात एकूण सात हल्लेखोर सहभागी होते. पैकी तीन तरुण स्थानिक असल्याचा दावा अशोक बिश्नोई याने प्रसारमाध्यमांशी बोलताना केला आहे.

दरम्यान, अशोक बिश्नोई याच्याविरोधात याआधी गॅस सिलिंडर अफरातफर प्रकरणात त्याच्या सहकाऱ्यांकडून पोलिस तक्रार दाखल करण्यात आली होती.