गेले काही दिवस पणजीसह गोव्यातील संपुर्ण भागात ढगाळ वातावरण असुन दोन दिवसांपुर्वी पणजीसह परिसरात पावसाच्या हलक्या सरी बरसल्या होत्या. तसेच 14, 15, 16 आणि 17 मे रोजी उत्तर आणि दक्षिण गोवा जिल्ह्यांमध्ये काही ठिकाणी मेघगर्जनेसह पाऊस पडण्याची शक्यता भारतीय हवामान विभागाने व्यक्त केली आहे.

यंदा मॉन्‍सूनचे आगमन लवकरच

गोव्‍यात यंदा मॉन्‍सूनचे लवकर आगमन होऊ शकते, अशी माहिती भारतीय हवामान खात्‍याने प्रसिद्धीपत्रकाद्वारे दिली आहे. केरळमध्ये यंदा मॉन्‍सून 27 मे रोजी दाखल होण्याची शक्‍यता आहे. केरळमध्ये पाऊस दाखल झाल्‍यानंतर अंदाजे 7 दिवसांनी गोव्‍यात मॉन्‍सून दाखल होतो. या पार्श्‍वभूमीवर राज्यात यावर्षी मॉन्‍सून दि. 2 जून रोजी दाखल होऊ शकतो, असेही वेधशाळेने म्‍हटले आहे.

हवामानशास्त्र विभागाने गुरुवारी (ता. १२) दिलेल्या माहितीनुसार बंगालच्या उपसागरात मॉन्सून दाखल होण्यासाठी हवामान पोषक झाले आहे. त्यामुळे रविवारपर्यंत (ता. 15) दक्षिण अंदमान समुद्र आणि लगतच्या उपसागरात मॉन्सून दाखल होण्याची शक्यता आहे. त्यानुसार यंदा मॉन्सून 27 मे रोजी केरळमध्ये दाखल होऊ शकतो. सांख्यिकीय मॉडेलच्या माध्यमातून हा अंदाज जाहीर करण्यात आला आहे.