वांते-सत्तरीत खाण खात्याने बेकायदा चिरेखाणीवर छापा टाकून मशिनरी जप्त केली. वांते-सत्तरीत गेली अनेक वर्षे सरकारी जमिनीत बेकायदा चिरेखाणी सुरू हाेत्या.

राजकीय आशीर्वादाने सुरू असलेल्या चिरेखाणींवर कारवाई केली जात नव्हती. काही दिवसांपूर्वी सुमारे 40 स्थानिकांनी सह्या करून चिरेखाणीविरोधात खाण खात्याकडे तक्रार दिली होती. तरीही त्या खाणीवर कारवाई केली जात नव्हती.

पण काल तक्रारदारांनी या चिरेखाणीविरोधात आक्रमक होऊन ‘जर कारवाई करीत नसाल तर वरिष्ठांकडे तक्रार करू’, असा इशारा दिल्यावर सरकारी अधिकाऱ्यांचे धाबे दणाणले आणि त्यांनी आज बेकायदेशीर खाणीवर कारवाई केली. यापूर्वी वांते-सत्तरीत चिरेखाणीवर छापा टाकायचा असल्यास आधीच त्यांना माहिती मिळत हाेती.

त्यामुळे ते चिरेखाणवाले मशिनरी लपवून ठेवत आणि अधिकारी गेल्यानंतर परत काम सुरू करीत; पण यावेळी तक्रारदार त्या जागेवर ठाण मांडून बसला. त्यामुळे मशिनरी बाहेर काढता आली नाही. साहजिकच अधिकाऱ्यांना ही मशिनरी जप्त करणे भाग पडले.

वांते-सत्तरीत दहापेक्षा जास्त ठिकाणी सरकारी जमिनीत चिरेखाणी सुरू हाेत्या. त्यापैकी दहाजणांच्या मशिनरी जप्त करण्यात आल्या आहेत. खाण खात्याने सत्तरी मामलेदार दशरथ गावस यांच्या उपस्थितीत कारवाई केली.