पणजी: शेती कायद्याच्या निषेधावरून अरुण जेटली यांनी राहुल गांधींना धमकी दिल्याचा त्यांचा दावा केवळ हास्यास्पद नाही तर तो लज्जास्पद आणि घृणास्पद देखील आहे, अशा शब्दात गोव्याचे मुख्यमंत्री प्रमोद सावंत यांनी राहुल गांधींचा समाचार घेतला. मनोहर पर्रिकरांची भेट घेतल्यानंतर राफेल खरेदीबद्दल देखील राहुल गांधी खोटे बोलले होते. शेवटच्या श्वासापर्यंत देशाची सेवा करणाऱ्या एका प्रतिष्ठित राजकारण्याचे चुकीचे चित्रण केले होते, असे सावंत म्हणाले.

केंद्रीय कृषी कायद्यांच्या विरोधात लढत असताना अरुण जेटली यांनी मला धमकी दिल्याचा दावा लोकसभेचे विरोधी पक्षनेते राहुल गांधी यांनी केला आहे. दिल्लीत आयोजित वार्षिक लीगल कॉन्क्लेवमध्ये गांधी बोलत होते.

"सरकारला अशाच पद्धतीने तुम्ही विरोध केलात तर आम्हाला तुमच्या विरोधात कारवाई करावी लागेल," अशी धमकी जेटली यांनी दिल्याचे राहुल गांधी म्हणाले. दरम्यान, त्यावेळी तुम्ही कोणाशी बोलताय हे तुम्हाला माहितीये का? असे प्रतित्युत्तर त्यांना दिल्याचेही गांधींनी यावेळी सांगितले.

यावरुन गोव्याचे मुख्यमंत्री प्रमोद सावंत यांनी राहुल गांधीवर सडकून टीका केली. राहुल गांधींनी खोटे बोलणे पुरे करावे असे म्हणत गांधी काल्पनिक कथांमध्ये भाजपच्या दिग्गज नेत्यांची नावे निर्लज्जपणे ओढत आहेत, असा आरोप त्यांनी केला.

"कृषी कायद्याला केलेल्या विरोधावरुन अरुण जेटलींनी त्यांना धमकी दिल्याचा दावा केवळ हास्यास्पद नाही तर लज्जास्पद आणि घृणास्पद आहे," असे सांवत म्हणाले.

तसेच, "हा तोच माणूस आहे, ज्याने आजारी असलेल्या मनोहर पर्रिकरांची भेट घेतल्यानंतर राफेल खरेदीबद्दल खोटे वक्तव्य केले होते. शेवटच्या श्वासापर्यंत देशाची सेवा करणाऱ्या एका प्रतिष्ठित राजकारण्याचे चुकीचे चित्रण त्यांनी केले होते. भारताचे भविष्य प्रामाणिकपणा आणि दृढनिश्चयाने घडवले आहे अशा सर्वात आदरणीय भाजप नेत्यांनाही सोडले नाही," असे सावंत म्हणाले.

"राहुल गांधी, तुम्हाला जे काही बकवास बोलायचे आहे ते बोला. पण ज्यांनी या देशाची सेवा करण्यासाठी आपले रक्त, घाम आणि जीवन वेचले त्यांची नावे घेऊ नका. तुमची निराशा तुम्हाला हयात नसलेल्या नेत्यांची निंदा करण्याचा अधिकार देत नाही," असेही सांवत म्हणाले.