पणजी: देशातील पाच राज्यांमध्ये विधानसभा निवडणुकांचे बिगुल वाजू लागलं आहे. यातच आता छोट्याशा गोव्यातही (Goa) विधानसभेच्या निवडणुकांच्या प्रचारासाठी अनेक पक्षांचे प्रमुख नेते गोव्यातील जनतेला रिझविण्यासाठी येऊ लागले आहेत. यातच सत्ताधारी भाजपबरोबर (BJP) कॉंग्रेस, महाराष्ट्रवादी गोमन्तक पक्षांसह इतर पक्ष निवडणूकीच्या तयारीला लागले आहेत. तृणमुल कॉंग्रेस गोव्यात दाखल झाल्यापासून राज्यातील राजकारणाला वेगळे वळण लागू लागले आहे. मात्र तृणमुल कॉंग्रेसमध्ये (Trinamool Congress) फूट पाडण्यासाठी सत्ताधारी पक्षाबरोबर इतर अनेक पक्ष युध्दपातळीवर प्रयत्न करु लागले आहेत.

यातच कॉंग्रेसमधूनच फुटून गेलेल्या लुईझिन फालेरो (Luizinho Faleiro) यांनी कॉंग्रेसमधील आपल्या मूळच्या सहकाऱ्यांना तृणमुल पक्षात सामील करुन घेण्यासाठी प्रयत्न सुरु केले आहेत. त्यामुळे गोव्यात कॉंग्रेसला पुन्हा एकदा खिंडार पडणार असल्याची चिन्हे दिसू लागली आहेत. या पार्श्वभूमीवर काँग्रेस नेते राहुल गांधी या महिन्याच्या शेवटी गोव्यात दाखल होणार असल्याची माहिती प्राप्त झाली आहे. राहुल गांधी गोव्यात दाखल होताच राज्यातील सक्रीय कॉंग्रेस कार्यकर्त्यांची बांबोळी येथील डॉ. श्यामाप्रसाद मुखर्जी इनडोअर स्टेडियममध्ये बैठक घेणार असल्याचे सांगण्यात येत आहे. कॉंग्रेस कार्यकर्त्यांमध्ये उत्साह भरण्यासाठी त्यांनी मार्गदर्शन करत गोवा विधानसभा निवडणूकीच्या निमित्ताने आपल्या प्रचार सभांचा अघाज करणार आहेत. विशेष म्हणजे राहुल गांधी यांचा हा दौरा राज्यातील कार्यकर्त्यांमध्ये विश्वास भरण्यासाठी असल्याचे सांगण्यात येत आहे.